《Ամ քելավի》անվամբ ռազմական օպերացիան սկսվեց, արդեն ժամը 3։00֊ից Իսրայելի օդուժը հրթիռահարում և ռմբահարում է Իրանի միջուկային օբյեկտներն երկրի ողջ տարածքում, հրթիռների պահեստներն ու կարևոր ստրատեգիական տարածքներ։ Հարվածներ են հասցնում ոչ միայն ռազմական օբյեկտներին, այլև այն շենքերին, որտեղ տեղավորված են Իրանի ռազմական ղեկավարությունը։ Հայտնում է <<Իսրայելահայեր>> թերթի խմբագիր Արտյոմ Չերնամորյանը։ Նրա փոխանցմամբ` Թեհրանի բազմաթիվ շրջաններում երևում են հզոր հարվածներից առաջացած պայթյուններն ու հրդեհները։ <<Իսրայելի թիկունքի ծառայությունը հնչեցրեց տագնապ` արթնացնելով բնակիչներին և պատրաստելով Իսրայելի բնակչությանը նոր պատերազմի։ Ի վերջո վերլուծությունս ճիշտ դուրս եկավ, միայն կարծում էի, որ գուցե սպասեին ևս 2 օր, բայց ոչ, գիշերն իրողություններ են փոխվել։ Այս պահին ստացանք ահազանգի ազդանշան իջնել ռմբապաստարան>>։

AP_իի (Ասսոշեյթեդ պրես) հաղորդմամբ` այս հարձակումը մեծացրել է հավանականությունը լիարժեք պատերազմի՝ Մերձավոր Արևելքի երկու դարավոր թշնամիների միջև։ Սա, կարծես, Իրանի դեմ ամենաուշագրավ հարձակումը լինի 1980-ականների Իրաքի հետ պատերազմի ժամանակներից ի վեր, քանի որ միաժամանակ մի քանի վայրեր են թիրախավորվել երկրի ներսում։ Իրանի պետական հեռուստատեսությունը հաղորդել է, որ կա մտավախություն՝ սպանվել է Իրանի Իսլամական հեղափոխության պահապանների կորպուսի ղեկավար, գեներալ Հոսեյն Սալամին։ Սա մեծ հարված կլինի Իրանի կրոնապետական կառավարմանը և անմիջապես կարող է հանգեցնել հակամարտության սրման։ Իսրայելի ղեկավարները հայտարարել են, որ հարվածը եղել է անհրաժեշտ՝ կանխելու այն, ինչ իրենք անվանում են Իրանի միջուկային զենքի ստեղծման ուղղությամբ առկա անմիջական սպառնալիք։ Վաշինգտոնում Թրամփի վարչակազմը, որը նախկինում հորդորել էր Իսրայելին զերծ մնալ հարձակումից՝ բանակցությունների շարունակման ֆոնին, հայտարարել է, որ ԱՄՆ-ը հարձակմանը մասնակցություն չի ունեցել և նախազգուշացրել է Իրանին՝ զերծ մնալ ամերիկյան շահերի կամ անձնակազմի դեմ գործողություններից։