Իսրայելի ռազմաօդային ուժերը «առաջին անգամն այդպիսի ուժգնությամբ» հարվածներ են հասցրել Թեհրանին, հայտարարել է Իսրայելի պաշտպանության նախարար Իսրայել Կացը։ Դրանից հետո համացանցում տարածվել է տեսանյութ, որտեղ երևում է Թեհրանի ամենաահավոր բանտերից մեկի՝ Էվինի մուտքի պայթյունը, որն, ըստ երևույթին, նպատակ ուներ բանտարկյալներին փախչելու հնարավորություն տալ։ Իրանի հեռուստատեսությունը շուտով հաստատել է Էվինի վրա հարվածը։ Այդ մասին հայտնել է նաև Իսրայելի պաշտպանության նախարարը։
Այս բանտը հայտնի է քաղբանտարկյալների նկատմամբ կիրառվող խոշտանգումներով ու բռնություններով։ Այստեղ բանտարկված են հազարավոր մարդիկ, ովքեր հանդես են եկել իշխող ռադիկալ իսլամիստների դեմ։ Այստեղ էլ կատարվում են մահապատիժները։ Այստեղ պահված նշանավոր նախկին բանտարկյալներից են Նոբելյան մրցանակակիրներ Շիրին Էբադին ու Նարգես Մոհամմադին։
Իսրայելցի լրագրող Ամիթ Սեգալը X-ում (Twitter) մեկնաբանել է Էվինի դարպասների պայթյունը՝ գրելով.
«Այս հարվածը Իսրայելի կողմից էսկալացիա է, քանի որ այժմ նա թիրախավորում է ոչ միայն Իրանի ռազմական օբյեկտները, այլև այն հաստատությունները, որոնք ճնշում են սեփական ժողովրդին և ուղղակիորեն չեն առնչվում Իսրայելի հետ։ Թվում է, թե Իսրայելը խաղում է ռեժիմի փոփոխության գաղափարի հետ»։