Իրանում կարծում են, որ Ատոմային էներգիայի միջազգային գործակալությունն իր հաշվետվությամբ պատերազմ է հրահրել Իսրայելի հետ։ Գերմանակակ BILD պարբերականի փոխանցմամբ` Իրանի ռեժիմին մոտ կանգնած Kayhan թերթը, որի հրատարակիչը՝ Հոսեյն Շարիաթմադարին է, հայտնի է որպես ռադիկալ իսլամիստ, պահանջել է ՄԱԳԱՏԷ-ի ղեկավար Ռաֆայել Գրոսիին մահապատժի ենթարկել։ Թերթը նրան նաև մեղադրել է Իսրայելի օգտին լրտեսելու մեջ։ ՄԱԳԱՏԷ-ն ավելի վաղ զեկույց էր հրապարակել Իրանի միջուկային ծրագրի մասին։ Զեկույցում նշվում էր, որ Թեհրանը թաքցնում է իր մշակման աշխատանքների մի մասը՝ խախտելով իր միջազգային պարտավորությունները։ Գործակալությունը նաև եզրակացրել էր, որ Իրանն իսկապես մոտեցել է միջուկային զենք ստեղծելու հնարավորությանը, ինչը Իսրայելում և ԱՄՆ-ում ընկալվել է որպես լուրջ վտանգ։ Զեկույցը զայրույթ էր առաջացրել Իրանի իշխանությունների մոտ։ ԱՄՆ պետքարտուղար Մարկո Ռուբիոն X-ում գրել է, որ Ռաֆայել Գրոսիի «ձերբակալման և մահապատժի» պահանջները «անընդունելի են և պետք է դատապարտվեն»։