Իրանում ջրի սուր պակաս է՝ գետերն ու ջրամբարները չորացել են․ Իշխանությունները մտածում են մայրաքաղաքը տեղափոխելու մասին։
Կառավարության մամուլի խոսնակ Ֆաթեմե Մոհաջերանին ջրի պակասը բնութագրել է որպես «ազգային խնդիր», որը կարող է վերածվել հումանիտար և տնտեսական աղետի։ Նա հայտարարել է․
«Թեհրանի ջրի վիճակը շատ վատ է, ուստի մենք ստիպված ենք քննարկել մայրաքաղաքը մեկ շաբաթով փակելու հնարավորությունը»։
«Փակել» ասելով՝ նկատի ունի, որ կդադարի պետական հիմնարկների, համալսարանների և դպրոցների աշխատանքը։ Ինչպես հաղորդում է Իրանի պետական IRNA լրատվական գործակալությունը, կառավարությունը քննարկում է խնդրի «ոչ ավանդական լուծումները»։ Առաջարկներից մեկն է՝ կրճատել աշխատանքային շաբաթը մինչև չորս օր և հնարավորության դեպքում մարդկանց տեղափոխել հեռավար աշխատանքի։ Դա պետք է խնայեր ջուր և էլեկտրաէներգիա։
Խնդիրը գրեթե ամբողջ երկրով մեկ է տարածված։ Մասնագետների տվյալներով՝ ջրամբարների 80%-ը գրեթե դատարկ են։ Հաջորդ երկու ամիսներին նորմալ ջրամատակարարում հնարավոր չի լինելու։ Ջրային պաշարները կլրացվեն միայն աշնանը՝ անձրևների շնորհիվ։
Անցյալ շաբաթ արդեն Թեհրանում և ևս 50 քաղաքներում իշխանությունները սահմանափակել են ջրամատակարարումը՝ անջատման ժամանակահատվածները կազմել են ընդհանուր առմամբ 12-ից 48 ժամ։ Արդյունքում երկրի բազմաթիվ բնակիչներ տեղափոխվել են հյուսիս՝ Կասպից ծովի կողմը, որտեղ ջրի պակաս չկա։
Իրավիճակի լրջության մասին է վկայում նաև նորընտիր նախագահ Մասուդ Փեզեշքիանի հայտարարությունը, որտեղ նա նույնիսկ մայրաքաղաքի տեղափոխման հնարավորությունն է անդրադարձել․
«Թեհրանում իրականում այլևս ջուր չկա»։
Իրանի մայրաքաղաք Թեհրանի բնակչությունը գերազանցում է 14 միլիոնը։
Լուսանկարում (IMAGO/Middle East Images)՝ Ջաջրուդ գետն է, որը ջուր էր մատակարարում Թեհրանին, գրեթե ամբողջությամբ չորացել էր արդեն այս տարվա մարտին։