Ստամբուլում հարյուրավոր մարդիկ բողոքի ցույցեր են անցկացրել թուրքական «LeMan» երգիծական ամսագրի դեմ՝ ծաղրանկարներից մեկում Մուհամմեդ մարգարեի պատկերը «տեսնելու» համար։ Ամսագրի խմբագրությունը պնդում է, որ ծաղրանկարում պատկերված չէ մարգարեն, այլ ընդամենը մեկը իսլամական աշխարհի 200 միլիոն Մուհամմեդ անուն կրող մարդկանցից։ Սակայն «LeMan»-ի դեմ բարձրացել է զայրույթի հսկայական ալիք։ Իրավիճակը սրվել է երկրի նախագահ Էրդողանի հայտարարություններից հետո, ով ծաղրանկարը անվանել է «զզվելի սադրանք» և «ատելության հողի վրա կատարված հանցագործություն»։
Ի՞նչ է պատկերված ծաղրանկարում.
Երկու ակնհայտորեն զոհված տղամարդ՝ հրեշտակների թևերով, ռմբակոծված քաղաքի վերևում, ձեռք է սեղմում։ Մեկն ասում է. «Սալամ ալեյքում, ես Մուհամմեդն եմ»։ Մյուսը պատասխանում է. «Ալեյքում սալամ, ես Մուսան եմ» (Մուսան Մովսեսի արաբերեն տարբերակն է)։
Հունիսի 30-ին իշխանությունները ձերբակալել են նկարչին, գրաֆիկական դիզայներին և «LeMan»-ի ևս երկու աշխատակցի՝ մեղադրելով նրանց կրոնական արժեքները «վիրավորելու» մեջ։ Սակայն որոշների համար դա բավարար չէր։ «Birgün» լրատվական հարթակի տվյալներով՝ «Շարիաթը կեցցե» կարգախոսով մի խումբ տղամարդիկ ջարդել են խմբագրության շենքի պատուհաններն ու վնասել դռները։ Երեկոյան բարկացած ամբոխը հարձակվել է Ստամբուլի մի սրճարանի վրա, ուր հաճախում են «LeMan»-ի աշխատակիցները։ «AFP»-ի տվյալներով՝ կռիվը վերաճել է մասսայական ծեծկռտուքի՝ 250-300 մարդու մասնակցությամբ։
Արդյունքում իշխանությունները փակել են Թաքսիմ հրապարակն ու Իստիկլալ առևտրային փողոցը, ինչպես նաև արգելել են ցույցերը։ Սակայն հուլիսի 1-ին մոտ 300 մարդ կրկին դուրս է եկել փողոց։ Որոշներն ուղղակիորեն բռնության կոչ են արել.
«Անհավատ քեմալիստները դրա համար կվճարեն», «LeMan, մի՛ մոռացեք Շառլի Էբդոյի մասին», գոռում էին նրանք խմբագրության շենքի դիմաց։
Միևնույն ժամանակ, «LeMan»-ի գլխավոր խմբագիր Թունջայ Աքգյունը մեղադրել է իշխանություններին «շատ համակարգված սադրելու» և «Charlie Hebdo»-ի գործի հետ կապված գիտակցված զուգահեռներ անելու մեջ։ «CHD» փաստաբանների ասոցիացիան X-ում (Twitter) ավելի կտրուկ է արտահայտվել. «LeMan»-ը ցանկանում են լռեցնել, իշխանությունների գործողությունները ամսագրի դեմ՝ ընդդիմության դեմ հարձակումն է ամբողջ երկրում։
Հիշեցնեն,ք որ 2015 թվականին իսլամիստները, մարգարե Մուհամմեդի ծաղրանկարը հրապարակելուց հետո, ներխուժել էին Փարիզի «Charlie Hebdo» ամսագրի խմբագրություն և սպանել 12 մարդու։