Կալիֆորնիայի Սանտա Ռոզա քաղաքում կայացել է World’s Ugliest Dog («Աշխարհի ամենաանհրապույր շուն») ամենամյա մրցույթը։ Այս անգամ հաղթող է դարձել բուլդոգի խառնածին շունը՝ Պետունյան․ գրեթե առանց մորթու, կարճ ոտքերով և մանր կնճիռներով պատված դնչիկով։ Չնայած հակասական տիտղոսին՝ նրա տիրուհին՝ Շենոն Նայմանը, միայն ուրախ է եղել, քանի որ առաջին տեղի համար ստացել է 5000 դոլարի մրցանակ։ Երկրորդ տեղը զբաղեցրել է մոպսը՝ Ջինի Լուն, որի լեզուն մշտապես թեքված կախվում է կողքից (3000 դոլար), իսկ երրորդը՝ չինական խուզած մորթով շունը՝ Պոպին (2000 դոլար)։ Մրցույթի ընթացքում շները հերթով դուրս են եկել բեմ՝ հանդիսատեսի ծափերի ներքո։ Դատավորները գնահատել են ոչ միայն արտաքին տեսքը, այլև շան բնավորությունը և լսարանի արձագանքը։ Մրցույթն անցկացվում է դեռևս 1970-ականներից։ Մասնակից շներից շատերը նախկինում ապրել են ապաստարաններում, և այս միջոցառումը հաճախ օգնում է նրանց գտնել նոր սիրող տերեր։ Լուսանկարում՝ Պետունյա (1), Ջինի Լու (2) և Պոպի (3)։