Կանադայի վարչապետի հավանական թեկնածուն` Քրիստիա Ֆրիլանդը, Թրամփին բռի է անվանել։ Գրեթե մեկ տասնամյակ իշխանության մեջ գտնվելուց հետո Կանադայի վարչապետ Ջասթին Թրյուդոն, ի վերջո, տեղի տվեց իր դեմ ուղղված քննադատության ալիքին և երկուշաբթի հայտարարեց իր հրաժարականի մասին։ Նրա քննադատներից մեկը եղել է իր ամենահավատարիմ և երկարամյա օգնականներից մեկը։ Դեկտեմբերին դեռևս որպես փոխվարչապետ, Քրիստիա Ֆրիլանդը խիստ քննադատել է Թրյուդոյի վարած քաղաքականությունը։ Նա անդրադարձել էր, օրինակ, հարկերի խնդրին։ Թրյուդոյի իշխող Լիբերալ կուսակցության անդամները ներկայումս պատրաստվում են պայքարել իշխանության համար, և 56-ամյա Ֆրիլանդն արդեն համարվում է ամենահավանական թեկնածուներից մեկը։ Ֆրիլանդը Կանադայում զբաղեցրել է տարբեր պաշտոններ՝ ձեռք բերելով միջազգային ճանաչում։ Տեղական մամուլում անգամ նրան տվել են «ամեն ինչի նախարար» մականունը։ Ի դեպ, Ֆրիլանդի մայրն ունի ուկրաինական ծագում։ Ֆրիլանդն աշխատել է լրագրող՝ տարիներ շարունակ լուսաբանելով Ռուսաստանի ու Ուկրաինայի թեման։
Ֆրիլանդը ներգրավված է եղել երկարատև և բարդ բանակցություններում՝ վերանայելու Հյուսիսային Ամերիկայի ազատ առևտրի համաձայնագիրը (NAFTA), որը Թրամփը ցանկանում է կրկին վերանայել։
Ֆրիլանդն այդ ժամանակից ի վեր դարձել է Թրամփի անձնական թիրախը, ով վերջերս նրան բնութագրել է որպես «լիովին թունավոր և գործարքներ կնքելու համար բացարձակ ոչ նպաստավոր»։ Ֆրիլանդն իր հերթին հայտարարել է, որ Թրամփը բանակցությունների ընթացքում իրեն պահել է «բռիի» նման։