Կառավարությունն իր այսօրվա՝ հունվարի 9-ի նիստում հավանություն է տվել «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» ՀՀ օրենքի նախագծին: Կառավարությունն օրինագծին ուղարկելու է Ազգային ժողով՝ քննարկման։Հարցը ներկայացրել է ԱԳ նախարար Արարատ Միրզոյանը։ «Քաղաքացիական նախաձեռնության կարգով ԱԺ քննարկմանն է ներկայացվել օրենքի նախագիծ ԵՄ-ին Հայաստանի անդամակցության գործընթացի մեկնարկի մասին, և այժմ կառավարությունը պետք է դիրքորոշում արտահայտի: Մենք առաջարկում ենք դրական դիրքորոշում արտահայտել՝ ելնելով մի քանի հանգամանքներից»,- ասել է Միրզոյանը։ ՀՀ վարչապետ Նիկոլ Փաշինյանը օրինագծի քննարկման ընթացքում նշել է, որ օրինածի ընդունումը չի նշանակում Եվրամիության անդամակցություն։ Ըստ Փաշինյանի՝ այդ հարցով անհրաժեշտ է հանրաքվե անցկացնել։ «Սա չի նշանակում Հայաստանի անդամակցություն Եվրամիությանը բառիս բուն իմաստով, քանի որ այս հարցի վերաբերյալ որոշում կարող է կայացվել միայն հանրաքվեի միջոցով, բայց պետք է նաև նշել, որ մինչև հանրաքվեն մենք պետք է որոշակի գործողություններ կատարենք՝ քննարկենք, մշակենք ճանապարհային քարտեզ Եվրամիության հետ»,- նշել է Փաշինյանը։ Նրա խոսքով՝ մինչև ճանապարհային քարտեզի ստեղծման շուրջ բանակցությունների մեկնարկը Հայաստանի Հանրապետությունը որևէ այլ գործողություն չունի անելու։«Եվ սա ինչի եմ ասում՝ հանրության շրջանում ակնկալիքները ճիշտ ձևակերպելու համար»,- հավելել է Փաշինյանը։Հայաստանում «Եվրաքվե» նախաձեռնությունը ստորագրահավաք էր իրականացրել ԵՄ-ին անդամակցելու գործընթաց սկսելու օրակարգով:
Կառավարությունը հավանություն է տվել ԵՄ-ին Հայաստանի անդամակցության գործընթացի մեկնարկի մասին օրենքի նախագծին
