Մայիսի 4-ին արտակարգ դեպք է տեղի ունեցել Կոտայքի մարզում։ Կորել է երկու տարեկան տղա երեխա, և դեպքի վայրում այս պահին ընթանում են ակտիվ որոնողական աշխատանքներ։
ՀՀ Ներքին գործերի նախարարության մամուլի քարտուղար Նարեկ Սարգսյանը «Փաստինֆո»-ին հայտնել է, որ երեխայի գետն ընկնելու վերաբերյալ խոսքը միայն վարկածներից մեկն է. «Միանշանակ ասել, որ երեխան գետն է ընկել, սխալ կլինի։ Դա այս պահին մշակվող տարբերակներից մեկն է։ Ոստիկանությանը տեղեկացրել են, որ տվյալ տարածքում երեխա է կորել, և քանի որ այդ վայրում գետ կա, որոնողական աշխատանքներն ընթանում են նաև գետում»։
Դեպքը տեղի է ունեցել Հրազդան խոշորացված համայնքի Մարմարիկ գետի հարակից տարածքում։
Երեխայի անհետացման մասին ահազանգը ստացվել է ՀՀ ՆԳՆ Փրկարար ծառայության 911 ճգնաժամային կառավարման ազգային կենտրոն, որտեղ քաղաքացին հայտնել է, որ իր երկու տարեկան որդին կորել է գետի ափին և կասկածներ ունի, որ հնարավոր է՝ երեխան անզգուշորեն ընկել է գետը։
Մանրամասները՝ սկզբնաղբյուր կայքում