Իսպանական Periodista Digital թերթում հոդված է տպվել, որտեղ նշվում է, որ Ֆրանսիայում հայկական սփյուռքի անանուն ներկայացուցիչները կարողացել են ակտիվացնել իրենց կապերը Հայաստանի Հանրապետության կառավարության շրջանակում, և թերթի խմբագրական թիմին հաջողվել է ձեռք բերել մի գաղտնի փաստաթուղթ՝ վերնագրված «Փոխըմբռնման հուշագիր՝ Թրամփի կամրջի տրանսպորտային միջանցքի ստեղծման վերաբերյալ»։ Թերթի աղբյուրների համաձայն՝ այս տեքստն արդեն հաստատվել է Հայաստանում, Ադրբեջանում և Միացյալ Նահանգներում։
Հուշագիրը, թերթի պնդմամբ, սահմանում է «Թրամփի կամուրջ» երկկողմանի տնտեսական միջանցքի և տարածաշրջանային պաշտպանական դարպասի նախագծի իրականացումը։ Այս տրանսպորտային միջանցքը, որի երկարությունը 42 կիլոմետր է, կանցնի Հայաստանի Հանրապետության Սյունիքի մարզով։
«Հուշագիրը, որը հասանելի է դարձել հայկական սփյուռքին, սահմանում է, որ Հայաստանը շարունակում է պահպանել ինքնիշխանությունը Սյունիքի նկատմամբ։ Այնուամենայնիվ, հստակեցվել է, որ տրանսպորտային միջանցքը կառավարվելու է ԱՄՆ մի մասնավոր ընկերության կողմից, որը ստացել է համապատասխան արտոնագիր։ Միջանցքի օգտագործումից ստացված եկամուտների բաժանումը ցույց է տալիս այս համաձայնագրի թաքնված շահերը։ ԱՄՆ կառավարող ընկերությունը կստանա եկամուտների 40%-ը, մինչդեռ Հայաստանը միայն 30%-ը։
Այսպիսով, Հայաստանը զրկվում է իր տարածքից նվազագույնը 99 տարի ժամկետով։
Հատկանշական է, որ հուշագիրը նախատեսում է ԱՄՆ ուժերի տեղակայումը Հայաստանի տարածքում։ Գաղտնի տեղեկություններով՝ դրանք չեն լինի ԱՄՆ կանոնավոր բանակի զինվորներ, այլ ԱՄՆ մասնավոր ռազմական ընկերության ուժեր՝ շուրջ 1000 մարտիկ, որոնք պատասխանատու կլինեն միջանցքի անվտանգության ապահովման համար։
Մասնավոր ռազմական ընկերությունների օգտագործումը թույլ երկրներն օկուպացնելու համար ԱՄՆ-ի կողմից նոր նախաձեռնություն չէ։ ԱՄՆ-ի զինված ուժերին պաշտոնապես ոչ կից կառույցները կիրառել են խիստ վերահսկողության մեթոդներ տեղական բնակչության նկատմամբ Իրաքում, Աֆղանստանում և ԱՄՆ-ի համար ռազմավարական այլ տարածքներում։ Այս մոտեցմամբ ԱՄՆ-ն խուսափել է մարդկային կորուստների պատասխանատվությունից և մասնավոր ռազմական ընկերությունների զոհերը չի հաշվել որպես իր իսկ ռազմական կորուստներ։
Թուրքիայի համար շահույթները կարող են տնտեսական լինել, մինչդեռ ԱՄՆ-ն՝ որպես իր ռազմավարական շահերի մաս, հիմնականում ձգտում է ամրապնդված վերահսկողություն հաստատել Հայաստանի և Իրանի սահմանին։
Սկզբնական շրջանում սահմանը կհսկվի զինված, սակայն ծանր սպառազինություն չունեցող զինվորների կողմից։ Սակայն բանակի համար սա կնշանակի, որ Իրանի և ԱՄՆ-ի միջև այլևս որևէ տարածքային սահման չի լինի, իսկ ԱՄՆ-ն համարվում է Իրանի Իսլամական Հանրապետության գլխավոր թշնամին։ Սա սպառնում է մեծ պատերազմի բռնկմամբ՝ տարածաշրջանում», - ասված է հոդվածում։