Հայաստանի պատմության թանգարանը և «Մեգերյան կարպետ» մշակութային համալիրը համատեղ նախաձեռնությամբ ամիսներ շարունակ 17-րդ դարով թվագրվող Արցախի մետաքսե ասեղնագործ ծածկոցի նմանությամբ գորգ են գործել։
Հայաստանի պատմության թանգարանի տնօրեն Դավիթ Պողոսյանի փոխանցմամբ՝ երբ թանգարանում սկսվել է «Դրվագներ ինքնության․ գորգ» խորագրով ցուցադրությունը, իրենց խնդրանքով «Մեգերյան կարպետ» ընկերությունը դազգահ է տեղադրել` ներկայացնելով գորգագործության մշակույթը։
«Մեր շատ այցելուներ մասնակցել են գորգագործությանը, և կենդանի, կրթական մի հետաքրքիր փորձառություն է փոխանցվել թանգարանի տարածքում։ Նպատակը մեկն էր՝ ցույց տալ, որ գորգագործությունը չի մեռել հայերի մեջ։ Գորգագործությունը կա և շարունակվելու է։ Հայերը հիմա էլ են գորգ գործում և տարածում։ Մյուս նպատակն այն է, որ գորգը գործելուց հետո օգտագործվի կենցաղում։ Ցանկացած ոք կարող է հուշանվերների սրահից գնել այն։ Վաճառքի արդյունքում ստացված միջոցները ներդրվելու են հին այլ նմուշներով մեր ազգային հավաքածուն համալրելու համար»,-նշեց Դավիթ Պողոսյանը։
«Մեգերյան կարպետ» մշակութային համալիրի տնօրեն Րաֆֆի Մեգերյանը շեշտեց՝ պետք է աշխարհով մեկ տարածենք, որ կանք ու պետք է լինենք։
«Մեր պապերից, տատերից մնացած ժառանգությունը եթե չպահենք, չպաշտպանենք, չշարունակենք, էլ ինչի՞ ենք պետք․ոչ մի բանի։ Եվրոպացիներն ավելի շատ գիտեին գորգի մասին, քան Հայաստանի ժողովուրդը։ Սակայն ՀՀ ժողովուրդը վերջին 10 տարվա մեջ շատ ավելի է սիրում գորգը։ Սկսել են հագուստի վրա դիզայնն օգտագործել։ Այսինքն, սկսեցին սիրել, գնահատել»,-ընդգծեց Րաֆֆի Մեգերյանը։
Հայաստանի պատմության թանգարանի Ազգագրության բաժնի գիտաշխատող, պ.գ.թ. Լիլիա Ավանեսյանը ներկայացրեց բնօրինակ նմուշի՝ 17-րդ դարով թվագրվող, Արցախի մետաքսե ասեղնագործ ծածկոցի առանձնահատկությունները և դրա զարդապատկերների խորհրդաբանությունը։
Գործված գորգի նյութը՝ բուրդ, բամբակ է։ Չափերը՝ 132*185սմ։
«Թանգարանի հավաքածուում ունենք մի քանի նմանատիպ ասեղնագործություն, գրեթե բոլորը Արցախից են, 17-րդ դար։ Այս նմուշը նվեր ենք ստացել 1967թ․՝ Լոնդոնից։ Նվիրատուն Հարություն Գալաջյանն է։ Այսպիսի օրինակներ կան նաև այլ թանգարաններում՝ Հայաստանից դուրս։ Բոլորը 17-րդ դարի են, առնչվում են Արցախի հետ»,-մանրամասնեց Լիլիա Ավանեսյանը։
Միջոցառման ավարտին տեղի ունեցավ գորգի կտրման արարողությանը, որից հետո Հայաստանի պատմության թանգարանի և «Մեգերյան կարպետ» մշակութային համալիրի միջև ստորագրվեց նվիրատվության պայմանագիր, ապա թանգարանի անունից շնորհակալագիր հանձնվեց «Մեգերյան կարպետ» մշակութային համալիրին՝ «Դրվագներ ինքնության. գորգ» խորագիրը կրող ցուցադրության շրջանակներում աջակցութուն ցուցաբերելու և համագործակցության համար։