Հայաստանի պետական ֆիլհարմոնիան մեկնարկում է 2025-2026 համերգաշրջանը և բացումը կազդադարվի The Nexus Artists նախագծի համերգով, որը կոչված է միավորելու տարբեր մշակույթներ եւ երաժշտական ժանրեր։
Խումբը ելույթ կունենա հետևյալ կազմով. Գրեհեմ Սաթլեր՝ տրոմբոն, վոկալ (Ավստրալիա), Իսայաս Ալվես՝ հարվածային գործիքներ (Բրազիլիա), Լյուսի Խանյան եւ Աննա Միքայելյան`
ստեղնաշարային գործիքներ (Հայաստան)։ Խմբի Music Healing խորագրով համերգը տեղի կունենա սեպտեմբերի 5-ին՝ ժամը 20:00-ին, «Առնո Բաբաջանյան» համերգասրահում։
Սեպտեմբերի ընթացքում նախատեսվում են նաեւ մի շարք ուշագրավ նախաձեռնություններ, այդ թվում՝ Music across borders հայ-գերմանական կրթամշակութային ծրագիրը՝ կիթառահար Թոմաս Ֆելոուի մասնակցությամբ, Alatone համերգային նախագիծը՝ Իսպանիայից, Պորտուգալիայից, Ռուսաստանից եւ
Ղազախստանից ժամանած երաժիշտների մասնակցությամբ, Yerevan Music Week միջազգային փառատոն-համաժողովը, որի շրջանակներում Երեւան կժամանեն ավելի քան 70 արտիստներ, խմբեր եւ խոսնակներ աշխարհի տարբեր երկրներից։
Ֆիլհարմոնիան միջոցառումները կհյուրընկալի իր հինգ սրահներում՝ «Առնո Բաբաջանյան» համերգասրահում, Ներքնահարկում, Գրադարանում, «Շուշիկի» սրահում
եւ ճեմասրահներում։
Անցած համերգաշրջանին զուգահեռ Ֆիլհարմոնիայում տեղի են ունեցել վերանորոգման, տեխնիկական եւ գույքային վերազինման աշխատանքներ, մասնավորապես՝ ՀՀ ԿԳՄՍ նախարարության աջակցությամբ ձեռք է բերվել Steinway & Sons համերգային ռոյալ,
փոխվել են համերգասրահի աթոռները, կատարվել է լուսային եւ ձայնային տեխնիկայի համալրում ժամանակակից սարքավորումներով եւ մի շարք այլ նորամուծություններ։
Նոր համերգաշրջանի ամենակարեւոր նորություններից է Ֆիլհարմոնիայի վերաբրենդավորումը. ամիսներ շարունակ մշակված բրենդ ինքնության տարրերը վերջապես կամբողջանան եւ կամփոփվեն մեկ բրենդբուքում՝ վիզուալ եւ հաղորդակցական
մեկ ընդհանուր արժեհամակարգի շուրջ։ Ուշագրավ է վերաբրենդավորման արդյունքում մշակված նոր լոգոտիպը, որը ներշնչված է Ֆիլհարմոնիայի պատմական շենքի ճակատից։ Շենքի սյուները վերածվել են մինիմալիստական, ռիթմիկ գծերի, որոնք հիշեցնում են թվային ձայնալիքներ, երգեհոնի խողովակներ կամ դաշնամուրի ստեղներ։ Այն վիզուալ պատմություն է ճարտարապետության եւ երաժշտության, ավանդույթի եւ մոդեռնիզմի մասին։ Վերաբրենդավորման հիմքում ընկած են Ֆիլհարմոնիայի բրենդ անհատականության արքետիպերը՝ ընդգծելով հաստատության պատմական ինքնությունը եւ առաջադեմ մշակութային հայացքները։