Արցախից բռնի տեղահանված 3020 ընտանիք բնակապահովման պետական ծրագրի շրջանակում հավաստագիր է ստացել։ Տեղեկությունը հայտնում է ՀՀ աշխատանքի և սոցիալական հարցերի նախարարության մամուլի ծառայությունը։ Նշվում է, որ 1044-ն արդեն իրացրել է հավաստագիրը։Նախարարությունը հիշեցնում է, որ առցանց դիմումների ընդունման գործընթացը շարունակվում է։ Ծրագրի շրջանակում հավաստագիրը տրամադրվում է բնակարան կամ առանձնատուն ձեռք բերելու, առանձնատուն կառուցելու, ինչպես նաև գործող հիփոթեքային վարկը մարելու համար։Աջակցությունը տրվում է ընտանիքի յուրաքանչյուր անդամի, այդ թվում՝ երեխաների համար՝ 3-ից 5 մլն դրամի շրջանակում։ Գումարը կախված է տարածաշրջանից. հեռավոր քաղաքներում և գյուղերում աջակցությունն ավելի մեծ է։Հիշեցնենք` ՀՀ ներքին գործերի նախարարության միգրացիայի և քաղաքացիության ծառայության տվյալներով՝ 2023 թվականի սեպտեմբերից հետո Արցախից 115 365 մարդ է բռնի տեղահանվել։Բռնի տեղահանված արցախցիների բնակապահովման պետական աջակցության ծրագիրը մեկնարկել է 2024թ–ի հունիսի 15-ից։ Հավաստագրերի վավերականության ժամկետը երկարաձգվել է մինչև 2028 թվականի դեկտեմբերի 31-ը: