Նոբելյան կոմիտեն որոշում է կայացրել 2025 թվականի Նոբելյան խաղաղության մրցանակը շնորհել Վենեսուելայի ընդդիմության առաջնորդ Մարիա Կորինա Մաչադոյին՝ Վենեսուելայի ժողովրդի դեմոկրատական իրավունքների պաշտպանության և բռնապետությունից ժողովրդավարություն անցնելու արդար և խաղաղ գործընթացի համար անխոնջ աշխատանքների համար: Այս մասին հայտնել է Նորվեգիայի Նոբելյան կոմիտեն:Այս տարի մի շարք երկրներ, այդ թվում՝ Հայաստանն ու Ադրբեջանը, Միացյալ Նահնագների նախագահ Դոնալդ Թրամփին էին առաջադրել այդ մրցանակին՝ օգոստոսի 8-ին Սպիտակ տանը ձեռք բերված համաձայնություններից ու հայ-ադրբեջանական խաղաղության պայմանագրի վկան դառնալուց հետո։ Ինքը՝ Սպիտակ տան ղեկավարը հայտարարում էր, թե հունվարին սկսելով պաշտոնավարումը առնվազն 8 պատերազմ է կանգնեցրել։ Մրցանակի շնորհման նախօրեին փորձագետները հայտարարել են, որ Թրամփը չի ստանա այն, քանի որ նա ոչնչացնում է միջազգային աշխարհակարգը, որն այդքան թանկ է Նոբելյան կոմիտեի համար:11 միլիոն շվեդական կրոն կամ մոտ 1,2 միլիոն դոլար արժողությամբ Խաղաղության Նոբելյան մրցանակը պետք է հանձնվի Օսլոյում դեկտեմբերի 10-ին:
ՄԱԿ-ի մարդու իրավունքների գրասենյակը շնորհավորել է Նոբելյան խաղաղության մրցանակի դափնեկիր Մաչադոյին։
«Սա արտացոլում է Վենեսուելայի ժողովրդի հստակ ձգտումը հանուն ազատ և արդար ընտրությունների, քաղաքացիական և քաղաքական իրավունքների և օրենքի գերակայության», - ասել է ՄԱԿ-ի մարդու իրավունքների գերագույն հանձնակատարի գրասենյակի խոսնակ Թամին ալ-Խիթան: