Հայ-ամերիկյան EngineerX ճարտարագիտական ընկերությունը նախաձեռնել էր ուսանողական մրցույթ՝ «Հայ ինժեներական ոլորտի էվոլյուցիան», որը բացառիկ հնարավորություն էր ուսանողների համար՝ արտահայտելու իրենց ստեղծագործական միտքն ու ինժեներական փորձը։
EngineerX-ի հիմնադիր բոստոնահայ Վահե Նիգողոսյանը նշում է, որ Հայաստանն ունի ինժեներական հարուստ պատմություն. «Մրցույթի հիմնական նպատակը Հայաստանի բուհերի ու քոլեջների ուսանողներին ոգևորելն է և միջազգային շուկայում մրցունակ դարձնելը։ Կենտրոնանալով կրթության վրա՝ ձգտում ենք կառուցել տաղանդավոր մասնագետների ամուր հիմք, ովքեր կարող են Հայաստանը տանել դեպի խելացի ապագա»:
Ինժեներական մրցույթն իրականացվում էր 2025 թվականի հունվար-ապրիլ ամիսներին։ Այն ներառում էր ՀՀ բոլոր խոշոր բուհերը՝ Հայաստանի ազգային պոլիտեխնիկական համալսարանը, Հայաստանի ամերիկյան համալսարանը, Երևանի պետական համալսարանը, Հայ-ռուսական համալսարանը, Հայաստանի ազգային ագրարային համալսարանը և այլն։ Մրցույթին ուսանողները մասնակցում էին 2-4 հոգուց բաղկացած թիմերով։ Այն ուներ մանրակրկիտ մշակված կանոններ և գնահատման մեթոդներ, որոնք թիմերին դրդել էին ցուցաբերել ստեղծագործ մոտեցում։
Մրցույթին գրանցվել էր 19 թիմ` շուրջ 57 մասնակից, ինչը վկայում է ուսանողների շրջանում
առաջացրած հետաքրքրության մասին։ Ընկերությունը թիմերի բոլոր անդամներին անվճար տրամադրել է SolidWorks կրթական լիցենզիաներ ծրագրակազմի փաթեթներից օգտվելու համար, նաև ողջ ընթացքում իրականացրել խորհրդատվություն և աջակցություն։
Ինժեներական մրցույթը Երևանում եզրափակվեց մեծ միջոցառմամբ, որտեղ ՀՀ ինժեներական ոլորտի փորձառու ժյուրիի անդամները ընտրեցին հաղթող թիմերին, որոնք ստացան դրամական պարգևներ։ Մրցույթի գլխավոր աջակիցներնզ էին՝ «Դավարո» և ամերիկյան «ME Companies»
կազմակերպությունները։
Եզրափակիչ փուլում՝ մրցույթի ամփոփմանը, 30 մասնակիցներից 17-ն ուսանողուհիներ էին, իսկ 3 հաղթող թիմերի կազմում բոլորն աղջիկներ էին։ Միջոցառման համար Մասաչուսեթսից ժամանած
Dassault Systèmes-ի գլոբալ գործընկերների ղեկավար Անդրե Կույումջյանը նշեց, որ ոչ միայն Հայաստանում, այլև աշխարհում աննախադեպ է, որ ինժեներական մրցույթի բոլոր հաղթողներն իգական սեռի ներկայացուցիչ են․«Մեր նպատակն է, որ երիտասարդ սերունդն ընտրի մեխանիկական ինժեների մասնագիտությունը, նաև կոտրենք այն կարծրատիպը, որ ոչ միայն տղամարդիկ, այլև կանայք կարող են իրենց փայլուն դրսևորել ու հաջողությունների հասնել միջազգային շուկայում»։
SolidWorks ծրագրով լավագույն գաղափարներ ներկայացրած թիմերին տրվեցին դրամական պարգևներ՝ 1-ին հորիզոնական՝ «ԱԴա» թիմ (Հայաստանի ամերիկյան համալսարան), 2-րդ տեղ՝ «GeoMind» թիմ («Արեն Մեհրաբյան» հիմնադրամ) և 3-րդ հորիզոնական՝ «EngiMinds» թիմ (Հայաստանի ազգային Պոլիտեխնիկական համալսարան) ։
Մրցույթի աջակից «Դավարո» ընկերության հիմնադիր տնօրեն Դավիթ Գալոյանը նշեց, որ լավագույն ուսանողներին սպասվում է փորձաշրջանի և աշխատանքի հնարավորություն իրենց ընկերությունում. «Շատ տաղանդավոր երիտասարդներ ունենք, բայց մասնագիտական ուղղվածությունն ու հետաքրքրությունը գնացել է դեպի IT ծրագրավորում, բայց հենց մեխանիկական ինժեներությունն ու հարակից ճյուղերն ավելի կարևոր են, որովհետև մեզ շրջապատող ցանկացած առարկա ստեղծված է ինժեներինգի միջոցով։ Այս մասնագիտությունը կախարդանքի նման է, որ ծագած խնդիրները վերածում ես իրականության։ Մրցույթը
նպատակային է, որ ուսանողները սովորեն, կիրառեն ու լավագույն արդյունք ստանանք»։