Բնական բուսական սպիտակուցների (օրինակ՝ լոբի, ընկույզ, ոսպ) կանոնավոր օգտագործումը կարող է նվազեցնել հիպերտոնիայի զարգացման ռիսկը։ Այս մասին հաղորդվում է Journal of the American Heart Association ամսագրում հրապարակված ուսումնասիրության մեջ։
Հեղինակները վերլուծել են մոտ 2300 մասնակցի տվյալներ, ովքեր հետազոտության սկզբում բարձր ճնշում չեն ունեցել և հետևել են նրանց շուրջ 18 տարի։ Պարզվել է, որ որքան շատ բուսական սպիտակուց է սննդակարգում, այնքան ցածր է հիպերտոնիայի զարգացման ռիսկը. օրական 20 գրամով ավելացնելիս ռիսկը նվազել է 16 տոկոսով։
Մինչդեռ կենդանական սպիտակուցները, ինչպես պարզվել է, էական ազդեցություն չեն ունեցել ճնշման վրա։ Սակայն գիտնականները ընդգծում են, որ խոսքը հատկապես նվազագույն վերամշակված մթերքների մասին է՝ բնական ընկույզ, լոբազգիներ, սոյա։ Բուսական սպիտակուցների տեսականին ավելի վերամշակված այլընտրանքներով լրացնելը, ընդհակառակը, կարող է վատացնել ճնշման ցուցանիշները։
Հեղինակները հիշեցնում են. բուսական սպիտակուցներ ընտրելիս կարևոր է ուշադրություն դարձնել ոչ միայն դրանց ծագմանը, այլև վերամշակման աստիճանին։ Պարզ մթերքները, ինչպիսիք են տոֆուն և ոսպը, ավելի օգտակար են, քան հավելանյութերով ու աղի բարձր պարունակությամբ մսային այլընտրանքները։
2025 թվականի մայիսին գիտնականներն արդեն նշել են ճնշումն իջեցնող մթերքները։ Պարզվել է, որ թեյի, մուգ շոկոլադի, խնձորի և խաղողի կանոնավոր օգտագործումը կարող է դրական ազդել զարկերակային ճնշման վրա։