Հովհ․ Թումանյանի անվան այգում քանդակագործ Հակոբ Հակոբյանի հեղինակած «Որս» քանդակի հարևանությամբ «Կնոջ ֆիգուր» քանդակը կտեղադրվի։ Առաջարկը կքննարկվի Երևանի ավագանու հոկտեմբերի 23-ի նիստի ժամանակ։

Նախագծում նշվում է, որ 2023թ. Հովհ. Թումանյանի անվան այգում տեղադրվել է Հակոբ Հակոբյանի հեղինակած «Որս» քանդակը, որի հարևանությամբ 2025թ. նախատեսվում է տեղադրել քանդակագործի «Կնոջ ֆիգուր» քանդակը: Հակոբ Հակոբյանը իր կյանքի վերջին տարիներին հրապուրվել է մանրաքանդակների ստեղծմամբ, որոնք պարզ աշխատանքային գործիքներից՝ աքցաններից ու հարթաշուրթերից պատրաստված քանդակներ են, որոնք ըստ արվեստագետի բնորոշման ունեն բնավորություն, յուրահատուկ կեցվածք և հիշեցնում են մարդկային տարբեր հոգեվիճակներ և ապրումներ:
«Հակոբ Հակոբյանի հեղինակած «Կնոջ ֆիգուր» քանդակի տեղադրման համար Երևան համայնքի բյուջեում փոփոխություններ չեն նախատեսվում, ֆինանսական ծախսերը
հոգալու է ՀՀ նախագահի աշխատակազմը:
Հակոբ Հակոբյանը ծնվել է 1923 թ. մայիսի 16-ին Եգիպտոսի Ալեքսանդրիա քաղաքում: 1962թ. ընտանիքով հայրենադարձվել է Հայաստան, 1963թ. անդամակցել է Հայաստանի նկարիչների միությանը, 1970թ. արժանացել է Հայաստանի վաստակավոր նկարչի կոչման, 1977թ.՝ ժողովրդական նկարիչ, 1997թ. արժանացել է «Մեսրոպ Մաշտոց շքանշանի»:
Կարևորելով տաղանդավոր արվեստագետի արժանվույն գնահատման,
ստեղծագործական ժառանգության արժևորման և հանրահռչակման անհրաժեշտությունը՝
առաջարկվում է ընդունել սույն որոշման նախագիծը: