Ղրղզստանում հունիսի 7-ի գիշերը ապամոնտաժվել է Լենինի 25 մետր բարձրությամբ արձանը, որը գտնվում էր հանրապետության երկրորդ խոշոր քաղաք Օշի կենտրոնական հրապարակում։ Այս մասին տեղեկացնում է «Կուրսիվ» պարբերականը։ Այս հուշարձանը համարվում էր Լենինին նվիրված ամենաբարձր արձաններից մեկն աշխարհում։ Այն տեղադրվել էր 1975 թվականին՝ քաղաքապետարանի շենքի դիմաց։ Արձանի քաշը 7.5 տոննա է։
Օշի քաղաքապետարանը հայտնել է, որ արձանը կտեղափոխվի հարակից պուրակ։ Պարբերականի փոխանցմամբ՝ արձանը տարիներ շարունակ տարակարծությունների առիթ է դարձել տեղացիների շրջանում։ Ոմանք պահանջել են այն ապամոնտաժել որպես «հնացած գաղափարախոսության խորհրդանիշ», իսկ մյուսները պաշտպանել են այն՝ դիտելով որպես պատմամշակութային ժառանգության մաս։ Ղրղզստանի խորհրդարանի պատգամավոր Իսհակ Մասալևը Լենինի արձանի ապամոնտաժումը Օշում որակել է որպես «ամոթալի քայլ»։ Նրա խոսքով՝ այս որոշման հարցում քաղաքաբնակների կարծիքը հաշվի չեն առել։