Երևանի քրեական դատարանի դատավճռով Մասիս համայնքի ղեկավար Դավիթ Համբարձումյանը դատապարտվել է 6 տարի 3 ամիս ժամկետով ազատազրկման։ Այս մասին ֆեյսբուքյան գրառմամբ տեղեկացրել է Դավիթ Համբարձումյանի փաստաբանական խմբի ներկայացուցիչ, փաստաբան Տիգրան Աթանեսյանը:
«Դատարանը նաև վերացրեց գրավը և որպես խափանման միջոց կիրառեց կալանք»,- գրել է Աթանեսյանը:
Համբարձումյանը 2019-ից ամբաստանյալի աթոռին է, մեղադրվում է հեղափոխության օրերին Երևանի Հանրապետության հրապարակ շտապող հանրահավաքի մասնակիցների նկատմամբ զենքով բռնություն գործադրելու համար:
Ըստ իրավապահների՝ 2018-ի ապրիլի 22-ին ժամը 16-17-ի սահմաններում Հայանիստ-Հովտաշատ խաչմերուկի բանուկ հատվածում տեղի է ունեցել միջադեպ, որին մասնակցել են Մասիսի քաղաքապետն ու նրա եղբայրը։