Կենդանիների աշխարհում նոր աստղ է հայտնվել՝ Չինաստանի Հեֆեյի վայրի բնության պարկում ապրող կապուցին տեսակի կապիկ՝ Դաչժուանը (անունը թարգմանաբար նշանակում է «մեծ» կամ «ուժեղ»)։ Նա ճանաչում է ձեռք բերել մայիսի սկզբին, երբ կենդանիների սիրահար մի օգտատեր Douyin-ում (Չինաստանում հասանելի TikTok-ի անալոգ) տեղադրել է նրա տեսանյութը՝ նշելով, որ կապիկն ունի «մարդկային քառակուսի դեմք»։
Չնայած որոշ մեկնաբաններ Դաչժուանին անվանում են «տգեղ-սիրունիկ», կապուցինների բուծման մասնագետ Չժան Չունսյուը բացատրել է, որ այս պրիմատների մոտ քառակուսի դեմքը և խոշոր կառուցվածքը գեղեցկության չափանիշ են համարվում։ Նա ավելացրել է, որ Դաչժուանը շատ զգայուն բնույթ ունի՝ ամաչկոտ է և նրբանկատ։ Անծանոթների մոտենալուն պես նա բարձրանում է վերև և թաքնվում։
Դաչժուանը հաջողություն ունի նաև անձնական կյանքում. նա ունի զուգընկերուհի Սյաոմեյը («փոքրիկ գեղեցկուհի»), ով ապրիլին նրանից ձագ է ունեցել։ Ձագուկին անվանել են Սյաոշուայ՝ «փոքրիկ հմայիչ»։