ԱՐԴԱՐՈՒԹՅՈՒՆ

Խորվաթիայում գտնվել է XV դարի «վամպիրի» գերեզման։ Հնագետները Խորվաթիայում հայտնաբերել են XV դարի թաղում, որտեղ տղամարդու մարմինը գլխատված, իսկ նրա գլխի տեղում դրված է եղել մեծ քար։ Այդ ժամանակներում «վամպիրներին» այդպես էին թաղում, որպեսզի նրանք չկարողանան դուրս գալ գերեզմանից մահվանից հետո և վրեժխնդիր լինել մարդկանցից։ Այս մասին գրում է Daily Mail-ը։ Գերեզմանը գտնվել է Ռաչեշա ամրոցում, որը կարող էր կապ ունենալ տամպլիերների (միջնադարյան ասպետական հոգևոր ուխտի անդամ) հետ։ Փորձագետների կարծիքով՝ տեղացիները թաղումից անմիջապես հետո գերեզմանը կրկին բացել են, ապա գլխատել մարմինը, նորից դրել այն գերեզմանում և գլխի փոխարեն տեղադրել քար։ Միջնադարյան ավանդույթների համաձայն՝ նման արարողությունը պետք է խանգարեր «վամպիրին» դուրս գալ մահից հետո, որպեսզի չկարողանար խեղդել կամ ահաբեկել կենդանիներին։ «Այն, թե ինչպես էր դրված մարմինը, հնարավոր չէ բացատրել շրջակա միջավայրի որևէ գործոնով։ Սա մարդկային միջամտություն էր, և դա տեղի է ունեցել այն ժամանակ, երբ փափուկ հյուսվածքները դեռ չէին քայքայվել։ Դա նշանակում է, որ ինչ-որ մեկը բացել է թարմ գերեզմանը, զգուշորեն առանձնացրել գանգը և շրջել կրծքավանդակը։ Դրա համար պատճառ պետք է լիներ»,- պատմել է գիտնական Նատաշա Շարքիչը։ Նա հավելել է, որ այդ տղամարդը կենդանության օրոք կարող էր լինել ասպետ, քանի որ հետազոտությունների ժամանակ նրա վրա հայտնաբերվել են բազմաթիվ վնասվածքներ, որոնք վկայում են բռնության, վերքերի և մարտերի մասին։ Ավելի վաղ հաղորդվել էր, որ շվեդ հնագետ և քանդակագործ Օսկար Նիլսոնը կարողացել է վերականգնել XVII դարում Լեհաստանում թաղված «վամպիր աղջկա» դեմքը։ Նա մահացել էր 18-20 տարեկանում և թաղվել Պեն գյուղի գերեզմանոցում, որը գտնվում է Լեհաստանի հյուսիս-արևմուտքում։ Հատկանշական է, որ նրա պարանոցին մանգաղ էր դրված, իսկ ոտքի մատներից մեկին ամրացված էր կողպեք։