Երկրաբան Ստանիսլավ Զավացկին պնդում է, որ Մարսի վրա կյանքի որոնումները սխալ ուղղությամբ են տարվել։ Թեև մարսագնացները հիմնականում ուսումնասիրել են նախկինում ջրով լցված խառնարաններ, Զավացկին առաջարկել է կենտրոնանալ Մարսի ամենախորը կիրճերի՝ Մարիների հովիտների վրա։ Նրա կարծիքով՝ այնտեղ ավելի բարենպաստ պայմաններ են՝ նվազ ճառագայթում, խիտ օդային շերտ և հնարավոր ստորգետնյա ջրերի գոյություն։ Նա չի բացառել, որ այդ կիրճերի հատակում կարող է լինել կյանք՝ ջրիմուռների, նախնական բույսերի կամ միկրոօրգանիզմների տեսքով։ Զավացկին առաջարկում է ուղարկել դրոններ՝ ուղղակիորեն հետազոտելու այդ տարածքը, քանի որ արբանյակային դիտարկումները խորքերում հնարավոր կյանքը չեն բացահայտում։
Նշենք, որ հետազոտողների մեծամասնությունը ենթադրում է, որ Մարիների հովիտները ձևավորվել են Մարսի ձևավորման վաղ ժամանակաշրջանում մոլորակի սառեցման հետևանքով։ Կիրճերի լայնությունը ժամանակի ընթացքում մեծացել է էրոզիայի հետևանքով։