Չինաստանը կառուցել է ստորգետնյա քաղաք՝ իր միջուկային զինանոցը պաշտպանելու և պատասխան հարվածի ապահովման համար: Դրա երկարությունը կազմում է 5000 կիլոմետր։ Գաղտնի նախագիծ. Չինաստանի պետական հեռուստաալիքը (CCTV) ցուցադրել է այսպես կոչված «ստորգետնյա Մեծ Չինական պատը»՝ հսկայական ստորգետնյա կառույցների ցանց, որը նախատեսված է միջմայրցամաքային բալիստիկ հրթիռների պահպանման, տեղափոխման և արձակման համար։ Weibo սոցիալական ցանցում տարածված ռեպորտաժում ցուցադրվել են այդ ռազմական համալիրի ներսի տեսարանները, հրթիռների տեղափոխման գործընթացը և մեկնարկի նախապատրաստական աշխատանքները։ Հաղորդման մեջ նշվում է, որ ստորգետնյա թունելների երկարությունը, որոնք անցնում են գրանիտե ժայռերի տակով, 5000 կիլոմետր է։ Այս մասշտաբային նախագծի նպատակը Չինաստանի ռազմավարական զինանոցը պաշտպանելն է և հրթիռների իրական արձակման կետերը թշնամուց թաքցնելը։ Հրթիռները կարող են ազատ տեղաշարժվել իրական և կեղծ հրթիռային հորերի միջև ու արձակվել Չինաստանի անսպասելի վայրերից։ Դրանց պաշտպանությունն ապահովում են ոչ միայն ժայռային շերտերը, այլև հաստ երկաթբետոնե պատերը։ Բոլոր մուտքերը հագեցած են պայթյունակայուն դռներով, որոնք ունեն ավելի քան մեկ մետր հաստություն։ Կառուցման պատմություն. Ինչպես հաղորդվում է` ստորգետնյա Մեծ Չինական պատի կառուցումը սկսվել է դեռևս 1990-ականներին, և այն մինչ օրս ընդլայնվում է։ Սակայն որոշ աղբյուրներ պնդում են, որ աշխատանքները մեկնարկել են դեռևս 1950-ականներին, ինչը տրամաբանական է, քանի որ այս նախագծի մասին գրեթե բոլոր տեղեկությունները գաղտնի են պահվում։ Այս ստորգետնյա հրթիռային քաղաքի նախագծողների թվում է նաև Չինաստանի բարձրագույն գիտական և տեխնոլոգիական մրցանակի դափնեկիր Ցյան Ցիհուն։ Նա դեռևս 2019 թվականին հայտարարել էր, որ իր ստեղծած համակարգը կարող է պաշտպանել հրթիռները ոչ միայն բունկերներ խոցող հատուկ զենքերից, այլև հիպերձայնային հրթիռներից։ Չինաստանի միջուկային ռազմավարությունը հիմնված է «նախկինում չհարվածելու» սկզբունքի վրա, ինչը նշանակում է, որ երկիրը պետք է պատրաստ լինի դիմակայելու միջուկային հարձակմանը, նախքան պատասխան գործողությունների դիմելը։ Չինաստանի գիտությունների ակադեմիայի ակադեմիկոսը շեշտել է, որ այս կառույցը երկրի «վերջին պաշտպանական գիծն» է։ Նրա խոսքով՝ հաշվի առնելով միջազգային լարված իրավիճակը, ազգային պաշտպանության ամրապնդման հարցն օրեցօր ավելի կարևոր է դառնում։ Պաշտպանության հոգեբանական գործոնը. Պեկինը չի թաքցնում իր միջուկային զինանոցին պատկանող ստորգետնյա կառույցների գոյությունը։ CCTV-ն նախկինում էլ ռեպորտաժներ է ցուցադրել Չինաստանի Ժողովրդա-ազատագրական բանակի 2-րդ հրետանային դիվիզիայի կողմից կառուցվող հրթիռային քաղաքի մասին։ Ըստ ամենայնի, Չինաստանի իշխանությունները միտումնավոր են թույլ տալիս, որ տեղեկատվությունը տարածվի համացանցում՝ հնարավոր հակառակորդներին առաջին հարվածի գայթակղությունից զերծ պահելու նպատակով։