Արամ Խաչատրյան համերգասրահում փետրվարի 8-ին տեղի ունեցավ Հայ կոմպոզիտորական արվեստի 16-րդ փառատոնի բացման համերգը։ Երեկոյի ընթացքում հնչեցին ժամանակակից կոմպոզիտորներ Վաչե Շարաֆյանի (Սինֆոնիա թիվ 4 «ՇՆՈՐՀԱԼԻ, աղօթական»: Ընծա Սբ․Ներսես Շնորհալի Ամենայն Հայոց Հայրապետի ննջման 850-րդ ամյակին և Սուրբ Էջմիածնի Մայր Տաճարի վերաօծմանը) և Քրիստինա Առաքելյանի ստեղծագործությունների համաշխարհային պրեմիերաները։
Համերգին հնչեցին նաև հատվածներ Էդգար Հովհաննիսյանի «Մարմար» սյուիտից։
Համերգը նվիրված էր կոմպոզիտոր Էդգար Հովհաննիսյանը 95-ամյակին։
Հայ կոմպոզիտորական արվեստի 16-րդ փառատոնի երկրորդ համերգը նվիրվում է կոմպոզիտոր Գագիկ Հովունցի 95-ամյակին։ Երեկոյի ընթացքում կհնչեն Գագիկ Հովունցի, Արթուր Ահարոնյանի և Արփինե Կալինինայի ստեղծագործությունները։
Ծրագրում․
• Արփինե Կալինինա. «Սրտի անհամբերությունը» եռակի կոնցերտ սոպրանոյի, ջութակի, թավջութակի և սիմֆոնիկ նվագախմբի համար (12 րոպե) | Ըստ Ստեֆան Ցվայգի համանուն "Ungeduld des Herzens" վեպի։
•Արթուր Ահարոնյան․«Տուն արի» 4 Պիես սոպրանոյի և սիմֆոնիկ նվագախմբի համար | Նվիրված է Արփի և Վաչե Պարսումեաններին (18 րոպե)
• Գագիկ Հովունց. Դաշնամուրի կոնցերտ, երկ 16 | Նվիրված է Սվետլանա Նավասարդյանին (23 րոպե)
Մենակատարներ՝ Ժան-Պոլ Գասպարյան (դաշնամուր)
Շուշիկ Պարսումեան (սոպրանո)
Դիրիժոր՝ Ալեքսանդր Հումալա
Փետրվարի 18-ին կայանալիք համերգին ելույթ կունենա նորաստեղծ Հայկական պղնձյա փողային կվինտետը։ Երեկոյի ընթացքում կհնչեն հայ կոմպոզիտորներ Ալեքսանդր Հարությունյանի, Արամ Խաչատրյանի, Կոնստանտին Պետրոսյանի, Պետրոս Շուժունյանի, Նուբար Ասլանյանի և Անդրանիկ Բերբերյանի ստեղծագործությունները։
Փետրվարի 24-ին հրավիրված համերգի ընթացքում ճապոնացի դաշնակահար Ռիեկո Ցուչիդայի և Հայաստանի պետական սիմֆոնիկ նվագախմբի կատարմամբ կկայանա Միշել Լեգրանի Դաշնամուրի կոնցերտի հայաստանյան պրեմիերան։ Երեկոյի ընթացքում կհնչի նաև անվանի կոմպոզիտոր Վարդան Աճեմյանի 4-րդ սիմֆոնիան։
Փառատոնային համերգները կղեկավարեն դիրիժորներ Ջուն-Սան Պարկը, Ալեքսանդր Հումալան և Ջանլուկա Մարչիանոն։
Հավելենք, որ Հայ կոմպոզիտորական արվետի փառատոնը հայաստանյան մշակութային կյանքի նշանակալից իրադարձություններից է և 2010թ․ հիմնադրվելուց ի վեր անշեղորեն հետևում է հայ դասական և արդի կոմպոզիտորական դպրոցի, ավանդույթների պահպանման և ճանաչման ընդլայնման իր առաքելությանը։