«Մեկնել էի Աշխարհի առաջնությանը՝ միայն ոսկե մեդալ նվաճելու համար»,-մամուլի ասուլիսի ժամանակ ասաց Ըմբշամարտի աշխարհի առաջնությունների կրկնակի ոսկե մեդալակիր, Եվրոպայի քառակի չեմպիոն Մալխաս Ամոյանը։

Նա նշեց, որ անցկացրել է 5 գոտեմարտ՝ ԱՄՆ-ի, Լեհաստանի, Թուրքիայի, Իրանի, Ճապոնիայի ըմբիշների հետ։ Շատ լավ է նախապատրաստվել, անցել է ուսումնամարզական հավաքներ, ապա նոր մասնակցել միջազգային մրցաշարի՝ նախքան Աշխարհի առաջնությունը։

«Գտնվում էի լավ մարզավիճակում և փառք Աստծո, կարողացա հռչակվել աշխարհի կրկնակի հաղթող։ Եզրափակչում, անկեղծ, չէի մտածում, որ կարող եմ հեշտ հաղթել ճապոնացուն, քանի որ նա մեր քաշային կարգի ուժեղագույն ըմբիշներից է, ուղղակի իմ մարզումները բերեցին, հասցրեցին նրան, որ կարողանամ հոգեպես էլ պատրաստ լինել։ Մեկ վայրկյան չեմ կասկածել, որ կարող եմ պարտվել ու երևի դա օգնեց, որ կարողանամ հաղթել»,-նշեց Մալխաս Ամոյանը։

Հիշեցնենք, որ Խորվաթիայի մայրաքաղաք Զագրեբում ընթացող հունահռոմեական ոճի ըմբշամարտի աշխարհի առաջնության 77 կգ քաշային կարգի եզրափակիչում Մալխաս Ամոյանը մրցեց Ճապոնիայի ներկայացուցիչ, 2024 թվականի Օլիմպիական խաղերի ոսկե մեդալակիր Նաո Կուսակայի հետ ու գերազանցեց նրան 10:1 հաշվով: Մալխաս Ամոյանը Փարիզ-2024-ի բրոնզե մեդալակիր է, Եվրոպայի չեմպիոն է դարձել 2022, 2023, 2024, 2025 թվականներին, իսկ աշխարհի առաջնության առաջին ոսկին նվաճել է 2021 թվականին: