Մետրոյի «Աջափնյակ» կայարանի կառուցման նախագծային աշխատանքներն ավարտված են, պետական համալիր փորձաքննության դրական եզրակացությունը ստացված է։ Բոլոր գործընթացներն ավարտին հասցնելու հիմքով ֆինանսավորման վերջին տրանշի փաստաթղթերը ներկայացված են աշխատակազմի ֆինանսական վարչություն։
Այս մասին Երևանի քաղաքապետարանի գործակարգավարական խորհրդակցության ժամանակ ասաց Երևանի կառուցապատման և ներդրումային ԾԻԳ-ի տնօրեն Անետա Բաբայանը:
«Բացի դրանից՝ կառուցման հարակից ազդեցության ենթարկվող տարածքում օտարման գոտի ունենք նախնական ուսումնասիրված։ Օտարման գործընթացները պատշաճ իրականացնելու համար արդեն իսկ հաստատման է տրված գերակա շահ ճանաչելու մասին որոշման նախագիծը, որն ուղարկում ենք Կառավարություն շրջանառության և Կառավարության որոշում ստանալու համար, որպեսզի գործընթացը հնարավորինս արագ մեկնարկենք։
Միաժամանակ մեր տնային առաջադրանքն ենք կատարում, որպեսզի գտնենք այն մեթոդաբանությունը, որով կկարողանանք շինաշխատանքներն այս տարի մեկնարկել»,- ասաց նա։
Քաղաքապետ Տիգրան Ավինյանն արձագանքեց՝ կարևոր աշխատանք է ամփոփվում, այն, որ «Աջափնյակ» կայարանի նախագծային աշխատանքներն ամբողջապես ընդունված են, բոլորը փորձաքննություններն անցած են՝ և՛ պարզը, և՛ համալիրը, և հաջորդիվ պետք է քննարկել ֆինանսական հարցերը։