2025 թվականի հուլիսի 15-ից Երևանի մետրոպոլիտենի «Երիտասարդական» կայարանում ներկայացված է Կոստան Զարյանի կյանքին և գործունեությանն առնչվող նկարազարդումների ցուցադրություն, որը կազմակերպվել է «Կողբ» հիմնադրամի նախաձեռնությամբ՝ «Կոստան Զարյան-140» նախագծի շրջանակում։
Ցուցադրությունը, հիմնված մեծանուն գրող, արվեստաբան և փիլիսոփա Կոստան Զարյանի կենսագրական տվյալների վրա, նպատակ ունի մեր մշակութային ժառանգությունը դարձնել առավել հասանելի և ընկալելի։ Նկարազարդումները անդրադառնում են գրողի կյանքի կարևոր փուլերին՝ սկսած կրթությունից և
հեղափոխական շարժումներին մասնակցությունից, մինչև եղբոր՝ Հովհաննես Աբելյանի շրջիկ թատրոնում ներգրավվածությունը, հանդիպումը Հռոմի պապի հետ, ինչպես նաև
շփումները ժամանակի մեծագույն արվեստագետների հետ: «Կողբ» հիմնադրամի նպատակներից է՝ նպաստել ինքնաճանաչմանը, ազգային մշակույթի ամրապնդմանը և զարգացմանը՝ ներկայացնելով մշակութային արժեքները բոլորինհասանելի և դիտարժան եղանակով:
Նկարազարդումների կենսագրական հիմքի հավաքագրման և խմբագրման հեղինակն է գրականագետ, արվեստաբան, թարգմանիչ, խմբագիր Երվանդ Տեր-Խաչատրյանը, իսկ
նկարազարդումների հեղինակը՝ Աշխեն Մուրադյանը։
«Կոստան Զարյան-140» նախագիծը մեկնարկեց տարեսկզբին՝ Ազգային պատկերասրահում կայացած լայնընդգրկուն միջոցառմամբ, որտեղ իրենց հիշողություններով կիսվեցին մաեստրո Տիգրան Մանսուրյանը, Երվանդ Տեր-Խաչատրյանը, պատմաբան Վարդան Մատթէոսեանը, Կոստան Զարյանի թոռները՝ Արա և Անաիս Զարյանները։ Երեկոյի ընթացքում հնչեցին Տիգրան Մանսուրյանի հեղինակած 3 խմբերգեր՝ գրված Կոստան Զարյանի «ԱՍԱՑՎԱԾ»-ների հիման վրա՝ «Հովեր» երգչախմբի կատարմամբ։
Նախագծի շրջանակում մեծանուն գրողը ներկայացվում է արվեստի տարբեր ձևերով՝ կերպարվեստ, երաժշտություն, գրականություն և այլն։ Նախագիծը ներառում է բանախոսություններ, ցուցադրություններ, հարցազրույցներ և այլ նախաձեռնություններ: «Կողբ» հիմնադրամի YouTube, Facebook և Instagram սոցիալական էջերում արդեն հրապարակվել են հարցազրույցներ այն արվեստագետների հետ, որոնք տարիներ շարունակ ուսումնասիրել են Զարյանի կյանքն ու ստեղծագործությունը։
«Բուն» TV-ի հետ համագործակցությամբ ստեղծվում է 10 մասից բաղկացած վավերագրական ֆիլմաշար, որը ներկայացնելու է մինչ այժմ լայն հանրությանը անհայտ փաստեր Կոստան Զարյանի կյանքի և գրական արժեքավոր ժառանգության մասին։
Ընթացքում է նաև Կոստան Զարյանի դիմաքանդակի պատրաստման գործընթացը (քանդակագործ՝ Մկրտիչ Մազմանյան)։ Նախագիծը խոստանում է նորանոր նախաձեռնություններ ուղղված մեծ գրողի հանրահռչակմանը: