«Ես քվեարկել եմ այնպիսի խորհրդարանի օգտին, որի հետ մենք կարող ենք շարունակել պահպանել խաղաղությունը, որը կհարգի Մոլդովայի Հանրապետությունը և նրա քաղաքացիներին, այնպիսի խորհրդարանի օգտին, որի հետ մենք կշարունակենք կառուցել եվրոպական Մոլդովա: Մոլդովան՝ մեր սիրելի հայրենիքը, վտանգի մեջ է, և այն ունի յուրաքանչյուրի օգնության կարիքը։ Դուք կարող եք այն փրկել ձեր քվեարկությամբ։ Վաղը կարող է շատ ուշ լինել։ Մեր երկրի ճակատագիրը պետք է որոշվի ձեր քվեարկությամբ, այլ ոչ թե գնված ձայներով»,-այս մասին այսօր՝ սեպտեմբերի 28-ին, հայտարարել է Մոլդովայի նախագահ Մայա Սանդուն։
Նա շեշտել է ընտրություններին Ռուսաստանի միջամտությունը, մեծ ռեսուրսների ներդրումը։
«Ե՛վ ես, և՛ մեր պետական կառույցները խոսել ենք տարբեր մեթոդների մասին՝ սկսած ձայներ գնելու փորձերից, որոնք արժեցել են հարյուր միլիոնավոր եվրոներ: Մենք խոսել ենք երիտասարդ մոլդովացիների կողմից հնարավոր անկարգություններ կազմակերպելու մասին։ Մենք բոլորս տեսել ենք, թե ինչպես են մոլդովացիներին հավաքագրել՝ կեղծ տեղեկատվություն ստեղծելու և տարածելու համար: Այս ամենը նրա համար է, որ Ռուսաստանը կարողանա վերահսկողություն հաստատել Քիշնևի նկատմամբ և օգտագործել Մոլդովան իր սեփական նպատակների համար: Մոլդովացիները պետք է իրենք որոշեն: Եկել է ժամանակը պաշտպանելու մեր երկիրը», - եզրափակել է Սանդուն:
Նշենք, որ Մոլդովայում այսօր խորհրդարանական ընտրություններ են, որոնք անցկացվում են համամասնական ընտրակարգով։ Երկրում բացվել է ավելի քան 2200 ընտրական կենտրոն, իսկ արտերկրում՝ 301, մինչդեռ Ռուսաստանում կա միայն երկուսը, իսկ Մերձդնեստրում՝ ընդամենը 12-ը։