Լոս Անջելեսում զանգվածային անկարգությունների ֆոնին Դոնալդ Թրամփի վարչակազմը քաղաք է ուղարկել 700 ծովային հետևակային և ևս երկու հազար Ազգային գվարդիային զինծառայող։ Այս որոշումն ընդունվել էէ հաշվի չառնելով այն, որ Կալիֆոռնիայի նահանգապետ Գևին Նյուսոմը դատի է տվել նախագահին և Պաշտպանության նախարարությանը՝ մեղադրելով նրանց ապօրինի միջամտության համար։ Բողոքի պատճառը անօրինական միգրանտների զանգվածային ձերբակալություններն են։ Քաղաքի կենտրոնում անկարգություններ են և տեղական իշխանությունները խոսում են «անարխիայի, թալանի և հրկիզումների» մասին։ Ոստիկանությունը սահմանել է պարետային ժամ, սակայն ուժերը դեռևս բավարար չեն. 8.6 միլիոն բնակչության համար ընդամենը 9000 ոստիկան է գործում։ Պենտագոնը հաստատել է, որ 700 ծովային հետևակայինները «ինտեգրվելու են» արդեն տեղակայված ուժերին։ ԱՄՆ Պաշտպանության նախարարության մամուլի քարտուղարը հայտարարել է, որ զինվորականների խնդիրը «բավարար ուժերի ապահովումն է»՝ ներգաղթի ծառայության՝ ICE-ի աշխատակիցներին աջակցելու համար։ Լրացուցիչ 2000 Ազգային գվարդիայի զինվոր ուղարկվել է Թրամփի անձնական հրամանով։ «Ծովային հետևակայինները հերոսներ են, որոնք պաշտպանել են ժողովրդավարությունը բազմաթիվ պատերազմներում։ Նրանց չպետք է տեղակայել ամերիկյան հողում»,_ասել է նահանգապետ Նյուսոմը։ Նրա հետ համաձայնել է նաև Կալիֆոռնիայի գլխավոր դատախազ Ռոբ Բոնտան, ով հայց է ներկայացրել Թրամփի և ՊՆ-ի դեմ։ «Թույլ տվեք հստակեցնել՝ ներխուժում չկա։ Հակասություն չկա։ Նախագահը փորձում է ստեղծել քաոս և ճգնաժամ` իր քաղաքական նպատակներին հասնելու համար», _հավելել է նա։