Նամիբիայում Ադոլֆ Հիտլեր անունով տեղացի քաղաքական գործիչը կրկին առաջադրվել է։ Օմպունդյա շրջանի ղեկավար Ադոլֆ Հիտլեր Ուունոնան հայտնվել է լրատվամիջոցների ուշադրության կենտրոնում։ Նա հայտնել է, որ մասնակցելու է նոյեմբերի 26-ին կայանալիք տարածաշրջանային ընտրություններին։ Ադոլֆ Հիտլեր Ուունոնան ղեկավարում է շրջանը 2004 թվականից և վերընտրվել է 2020 թվականին՝ ստանալով ձայների գրեթե 85 տոկոսը։ Վերջին տարիներին պաշտոնյայի վրա ճնշումն ավելացել է, քանի որ բնակիչները բողոքել են շրջանի լճացումից և ենթակառուցվածքների բացակայությունից։ Տեղական «The Namibian» թերթը մեջբերել է մի ընտրողի խոսք, որը զայրացած ասել է. «Մենք նրան չենք վճարում աշխատանքի վայրում խաղաքարտեր խաղալու համար»։ Հիտլերն ընդգծել է, որ ինքը որևէ կապ չունի նացիստական հանցագործությունների հետ, իր հայրը պարզապես չի հասկացել պատմական համատեքստը և ինքը միայն հանրային միջոցառումների ժամանակ է օգտագործում Ադոլֆ անունը։