Նույնիսկ չափավոր սթրեսը կարող է զգալիորեն մեծացնել կաթվածի ռիսկը կանանց մոտ։ Այս եզրակացությանն են եկել Ֆինլանդիայի Հելսինկիի համալսարանի գիտնականները։ Ուսումնասիրության համար մասնագետները վերլուծել են 18-ից 49 տարեկան 426 մեծահասակների առողջության վերաբերյալ տվյալները, ովքեր կաթված են տարել անհայտ պատճառներով, և համեմատել նրանց 426 առողջ մարդկանց հետ, ովքեր կաթված չեն ունեցել։ Բոլոր մասնակիցները լրացրել են 10 հարցից բաղկացած հարցաթերթիկ՝ իրենց սթրեսի մակարդակի վերաբերյալ։ Կաթված տարած հիվանդները նաև պատասխանել են հարցին, թե ինչպիսի՞ սթրես են ունեցել կաթվածից մեկ ամիս առաջ։ Հարցերը ներառել են, օրինակ, հետևյալը. «Որքա՞ն հաճախ եք վերջին ամսվա ընթացքում զգացել, որ չեք կարող վերահսկել ձեր կյանքում տեղի ունեցողը»։ Գիտնականները հայտնաբերել են, որ կաթված տարած հիվանդները հաճախ ավելի բարձր մակարդակի սթրես են ունեցել։ Նրանց մոտ 46%-ը հաղորդել է միջին կամ բարձր սթրեսի մասին, մինչդեռ կաթված չունեցողների շրջանում այդ ցուցանիշը կազմել է 33%։ «Երիտասարդները հաճախ սթրեսի են ենթարկվում աշխատանքի հետ կապված պահանջների և ճնշման պատճառով` ներառյալ երկար աշխատանքային ժամերը և զբաղվածության անորոշությունը, ինչպես նաև ֆինանսական դժվարությունները», – նշել է հետազոտության հեղինակ Նիկոլաս Մարտինես-Մախանդերը։ Այլ ռիսկի գործոնները հաշվի առնելուց հետո պարզվել է, որ չափավոր սթրեսը կապված է կանանց մոտ կաթվածի ռիսկի 78%-ով աճի հետ։ Սակայն տղամարդկանց դեպքում սթրեսի և կաթվածի միջև կապ չի հայտնաբերվել։ Դրա հնարավոր բացատրություններից մեկը սոցիալական և հոգեբանական գործոններն են։ Կանայք ավելի հաճախ են հայտնում քրոնիկական սթրեսի մասին, քանի որ ստիպված են համատեղել տարբեր դերեր, ինչպիսիք են աշխատանքը, ընտանիքը և հարազատների խնամքը։ Միևնույն ժամանակ, տղամարդկանց մոտ կաթվածի հետ կարող են ավելի սերտորեն կապված լինել այլ գործոններ, օրինակ՝ ալկոհոլի չարաշահումը, որը նախկինում կապվել է կաթվածի բարձր ռիսկի հետ։ Բացի այդ, տղամարդկանց հաճախ սովորեցնում են թերագնահատել սթրեսը և տոկուն մնալ դժվարությունների հանդեպ, ինչը նույնպես կարող էր ազդել հետազոտության վերջնական արդյունքների վրա։
Նույնիսկ չափավոր սթրեսը կանանց մոտ կարող է բարձրացնել կաթվածի ռիսկը
