Գիտնականները փորձում են գտնել ապացույցներ այն մասին, թե ո՞վ է իրականում գրել Աստվածաշունչը։
Աստվածաշնչագետ, Փենսիլվանիայի Վիլանովա համալսարանի պրոֆեսոր Էլիզաբեթ Պոլցերը պնդում է, որ Աստվածաշունչը գրվել է ավելի քան 40 տարբեր մարդկանց կողմից։ Այդ թվում նաև նաև Ծննդոց (Աստվածաշնչի առաջին գիրքը) և Ելից գրքերը(Ելից գիրքը Աստվածաշնչի երկրորդ գիրքն է), որոնք ավանդաբար վերագրվում են Մովսեսին։
Պրոֆեսոր Պոլցերի խոսքով՝ այս սուրբ գրությունը կազմելու գործում «տասնյակ» հեղինակներ են մասնակցել։ Նա նշում է, որ յուրաքանչյուր գիրքը պետք է առանձին դիտարկվի՝ որոշելու համար, թե ո՞վ է այն գրել։
Նա MailOnline-ին հայտնել է, որ Աստվածաշնչի հեղինակների բացահայտումը հեշտ գործ չէ և ընդունում է, որ դա «բավականին բարդ» խնդիր է։ Որոշ գրքերի հեղինակները հայտնի են, բայց շատերը մնում են գաղտնիքի մեջ թաղված։
Քրիստոնեական Աստվածաշունչը բաժանվում է երկու մասի՝ Հին Կտակարան, որը սկզբնապես գրվել է եբրայերեն տարբեր դարերում, և Նոր Կտակարան, որը ստեղծվել է քրիստոնյաների կողմից մ.թ. առաջին դարում։
Հին Կտակարանի ստույգ ամսաթվերը որոշելը դժվար է, քանի որ տարբեր օրացույցների անհամապատասխանություններ ու պատմական տարբեր մեկնաբանություններ կան։
«Ամենահին նյութերից որոշները կարող են թվագրվել մ.թ.ա. 1200 թվականին, սակայն գրքերը, ամենայն հավանականությամբ, խմբագրվել են իրենց ներկայիս տեսքով մ.թ.ա. 6-րդ կամ 5-րդ դարերում»,- պարզաբանել է պրոֆեսոր Պոլցերը։ Իսկ Նոր Կտակարանը գրվել է մ.թ. առաջին դարում։