Երաժիշտ Հասմիկ Համբարյանն առանձնացրել է «Եվրատեսիլ 2025»-ի ուշագրավ բովանդակությամբ երգերը։
Հայաստան - «... Ես շատ եմ արնահոսել, ավելին, քան կարծում եք, բայց չեմ վերացել... ասում եք, թե ինձ ծնկի եք բերելու և կոտրելու... ես Փրկվողն եմ, Ողջ մնացողն եմ, Պայքարողն եմ» /հայ ժողովրդի բազմադարյա ճակատագիրը/: Բարձր արտիստիզմ, խարիզմա, հրաշալի կատարում:
Հունաստան - «Մի արտասվիր, իմ անուշ մայր, թեև քեզ սգո սև զգեստ են հագցրել,իմ ուժասպառ մարմինը ոչ մի բոց չի կարող կլանել, կրակի գրկում ծնված ծիծեռնակներն անկախ նրանից, թե որքան հեռու կթափառեն, երբեք չեն մոռանա սրբազան հողը, որ եղել է իրենց Հայրենիքը» /նվիրում հույների ցեղասպանության զոհերի հիշատակին և հայրենիքից գաղթածներին/: Սիրուն ձայն, հուզիչ թեմա:
Ալբանիա - Հայրենիքից Իտալիա տեղափոխված երաժիշտներն իրենց երգերում միշտ անդրադառնում են երիտասարդների գաղթելու խնդրին, հայրենիքը լքելուն, համայն մարդկության երջանկության թեմաներին. «...Ինձ մաքուր սիրտ ուղարկեք իմ խավարում, ես ձեզ լույս եմ ուղարկում... շողա, իմ երկիր, որտեղ ես ծնվել եմ, երբեք չեմ մոռանա քեզ, շողա, աշխարհ...»: Շատ հուզիչ ու գրավիչ կառուցվածքով երգ ու կատարում 2 հրաշալի արտիստների կողմից:
Էստոնիա - Երիտասարդ էստոնացի Թոմի Քեշն իր բեմական կեղծանունը վերցրել է քեշ՝ կանխիկ գումար բառից: Խենթ ու համարձակ Թոմին իր երգերում ծաղրում է ժամանակակից կյանքի արատավոր երևույթները, փողամոլությունը, պրիմիտիվացումը, որի լավագույն ապացույցներից «Էսպրեսո Մակիատո» երգն է:
Լեհաստան - Շամանուհու կամ հեթանոսական աստվածուհու կերպար ընդունած երգչուհին անդրադառնում է նեոհեթանոսական ու միստիկ թեմաների, գովերգում վհուկներին և չար աստվածություններին, ինչպես իր եվրատեսիլյան «Գայա» երգում: Հզոր էներգետիկա, արխայիկ հնչողություն, բայց «սև» կերպարներ:
Ֆրանսիա - Այս տարի Ֆրանսիան մի հրաշք բովանդակությամբ երգ է ուղարկել՝ մայրության մասին: Երգչուհին շատ հուզիչ կերպով պատմում է, որ մայրանալով դադարել է հաշվել տարիները, իր մեջ զարմանալի ուժ է գտնում և կյանքի վերաիմաստավորում, երբ իրեն մի էակ անվանում է «Մամա»:
Լյուքսեմբուրգ - 1965թ․-ի ֆրանսիական էստրադայի աստղ Ֆրանս Գաալի՝ լյուքսեմբուրգյան եվրատեսիլյան երգի ժամանակակից ռիմեյքը: Կին-տիկնիկը հրաժարվում է լինել պարզապես զվարճալի ու սիրուն խաղալիք և իր անհատականությունն է ընդգծում: Սիրուն բեմադրություն, հաճելի երգչուհի և մթնոլորտ:
Լիտվա - Հրաշալի ռոք երգ է ուղարկել Լիտվան՝ ցավի, տառապանքի, մարդկային օտարացման մասին:
Լատվիա - նեոհեթանոսական ֆոլկ երգ՝ քողարկված քաղաքական ենթատեքստով՝ միջուկային զենքի հնարավոր հարվածների և դրանց դիմակայելու մասին:
Ուկրաինա - Շատ սիրուն, երաժշտականորեն կատարյալ կառուցված և իհարկե, բացահայտ քաղաքական տեքստով երգ են ներկայացնում ուկրաինացիները. աղոթքի թռչունին ուղարկում են թռչելու և միանալու իրենց գաղթած հայրենակիցներին և նրանց, ովքեր մտահոգ են իրենց մասին: