Գիտնականները պատմության մեջ առաջին անգամ լաբորատոր պայմաններում մարդկային ամբողջական ատամ են աճեցրել։
Հետազոտության հաջողության բանալին նոր կենսաբանական նյութն է, որը լիովին նմանակում է ատամի զարգացման բնական միջավայրը և խթանում է բջիջների միջև ազդանշանների փոխանակումը, ինչի արդյունքում սկսվում է ատամի ձևավորման գործընթացը։ Տեղեկանում ենք Գիտություն և տեխնոլոգիա էջից։
Նշվում է, որ այս տեխնոլոգիան հեղափոխական է համարվում․ աճեցված ատամները պատրաստվում են հենց հիվանդի սեփական բջիջներից և կարող են տեղադրվել ծնոտի մեջ նույնիսկ զարգացման վաղ փուլում, որտեղ շարունակում են բնականոն աճել և զարգանալ՝ լրիվ կատարելով բնական ատամի բոլոր ֆունկցիաները։ Սա արմատապես տարբերվում է ավանդական իմպլանտներից և պլոմբաներից, որոնք չեն կարող լիարժեք փոխարինել բնական ատամի կառուցվածքն ու վերականգնողական հնարավորությունները։ Գիտնականները վստահ են, որ ապագայում այս մեթոդը կարող է ամբողջությամբ փոխարինել ատամի վերականգնման ներկայիս միջոցները և նոր էջ բացել ռեգեներատիվ ստոմատոլոգիայում։