Օմսկի Կիրովի շրջանային դատարանը երկրում արգելել է 12 կայքէջեր, որտեղ Վլադիմիր Պուտինը համեմատվում է Ադոլֆ Հիտլերի հետ։ Արգելվել են այն լուսանկարները, որտեղ Պուտինին ֆոտոշոփով ավելացրել են Հիտլերի բեղերը և սանրվածքը։ Նաև դատարանը արգելել է «Putler kaput» («Պուտլեր, կապուտ») գրառումները, որոնք հատկապես տեսանելի են բողոքի ակցիաների ժամանակ։ Այսպես, դատարանը արգելել է բլոգեր Իլյա Վարլամովի լուսանկարը, որտեղ մի կին պաստառ է բռնել «Պուտլեր, խմի՛ր թույն, մինչև կապարով չհյուրասիրեն» գրությամբ։ Բացի այդ, արգելվել էՊավել Դերևյանկոյի «Հիտլեր կապուտ!» ֆիլմի կադրերը։ Ցանկում ընդգրկվել է «Стихи.ру» կայքի էջը, որտեղ տեղադրված է Պուտինի պատկերով նկար։ Նկարի վրա գրված է. «Ինչպես փրկել Ռուսաստանը անարգանքից», իսկ նա գլխին ատրճանակ է դրել։ Նաև արգելվել է ЖЖ-ի (LiveJournal) էջը, որտեղ տեղադրված էր «Կրոկոդիլ» ամսագրի շապիկի ոճով պատկեր։ Նկարներն արգելելու պահանջը ներկայացրել էր Օմսկի դատախազությունը։ Նրանք կարծում են, որ դրանք «բացասաբար են ազդում հասարակության և պետության շահերի վրա, դրդում են անորոշ թվով անձանց ձեռնարկել ահաբեկչական գործունեություն, հանցագործություններ և նպաստում են դրանց կատարմանը»։