ՀՀ Վճռաբեկ դատարանը, սեպտեմբերի 26-ի որոշմամբ, ՊԲ նախկին հրամանատար Ջալալ Հարությունյանի և նրա պաշտպանի վճռաբեկ բողոքը վարույթ ընդունելը մերժել է, և դատավճիռը ստացել է օրինական ուժ։
Սա ենթադրում է, որ Ջալալ Հարությունյանը պատիժը կկրի համապատասխան քրեակատարողական հիմնարկում։
Ավելի վաղ Ջալալ Հարությունյանի պաշտպանները կրկին վճռաբեկ բողոք էին ներկայացրել՝ պահանջելով բեկանել վճիռը և կայացնել արդարացման դատական ակտ։
2025 թ. հունվարի 15-ին Սյունիքի մարզի ընդհանուր իրավասության դատարանում տեղի ունեցած դատական նիստում Ջալալ Հարությունյանի նկատմամբ մեղադրական վճիռ էր կայացվել։
Փետրվարի 6-ին կայացած նիստի ժամանակ էլ հանրային մեղադրողը պահանջել էր ՊԲ նախկին հրամանատարին դատապարտել ազատազրկման՝ 6 տարի ժամկետով, իսկ տուժող կողմը՝ 8։
Ջալալ Հարությունյանը մեղավոր է ճանաչվել ՀՀ Քրեական օրենսգրքի 550-րդ հոդվածի 3-րդ մասով՝ «զինվորական պաշտոնեական անփութություն, որը կատարվել է ռազմական դրության, պատերազմի ժամանակ կամ մարտի պարագաներում, կամ որն անզգուշությամբ առաջացրել է մարդու մահ» հոդվածի հատկանիշներով։
Հունիսի 18-ին ՀՀ Վերաքննիչ դատարանը Արցախի պաշտպանության բանակի նախկին հրամանատար Ջալալ Հարությունյանի դատավճիռը թողել է անփոփոխ. նա դատապարտվել է 5,5 տարով։