Ձմեռային ջերմաստիճանի տատանումները նպաստում են ատամի էմալի վրա ճաքերի առաջացմանը։ Այս մասին «Ռադիո Սպուտնիկ»-ին տված հարցազրույցում պատմել է ատամնաբույժ Ալեքսեյ Անտիպենկոն։ Նրա խոսքով՝ կյանքի ընթացքում էմալը կարող է վնասվել արտաքին միջավայրի ազդեցությունից և ֆունկցիոնալ ծանրաբեռնվածությունից, ինչը բնական գործընթաց է։ Սակայն ցուրտ եղանակին նման միկրոճաքերի առաջացման ռիսկը զգալիորեն մեծանում է։ Մասնագետը ընդգծել է, որ հատկապես վտանգավոր են կտրուկ ջերմաստիճանային հակադրությունները, օրինակ՝ ծխելը սառնամանիքին կամ դրսում տաք ըմպելիքներ օգտագործելը։ Նա նշել է, որ ծխախոտի կամ վեյփի գոլորշին ներշնչելիս ջերմաստիճանը կարող է հասնել 60-75 աստիճանի, իսկ շրջակա սառը օդի հետ 40-50 աստիճան տարբերությունը բերում է միկրոճաքերի առաջացման։ Նմանատիպ իրավիճակ է առաջանում, երբ մարդը ձմռանը դրսում տաք սուրճ է խմում։ «Սա կարող է հանգեցնել միկրոճաքերի զարգացման, հատկապես երիտասարդների մոտ, երբ էմալը դեռևս ձևավորման փուլում է»,-ասել է նա։ Անտիպենկոն հավելել է, որ միկրոճաքերի առկայությունը մեծացնում է կարիեսի առաջացման հավանականությունը։ Նա պարզաբանել է, որ հիվանդություն առաջացնող բակտերիաները սովորաբար կուտակվում են ատամի բնական ակոսներում, սակայն եթե վնասվածք կա, այն դառնում է խոցելի հատված։ «Եթե ճաքի տարածքում առաջանում է փառ, բակտերիաներն ամրանում են այնտեղ՝ ստեղծելով խիտ կառուցվածք, որը պահում է սննդի մնացորդները։ Սա արագացնում է շաքարների և ածխաջրերի քայքայման գործընթացը, որի արդյունքում արտադրվում է օրգանական թթու, որն էլ քայքայում է էմալը։ Այն վայրերում, որտեղ ատամի մակերեսը արդեն իսկ թուլացած է ճաքերով, կարիեսը զարգանում է շատ ավելի արագ,-եզրափակել է մասնագետը։