ԱՄՆ Լուիզիանա նահանգի Shreveport Aquarium ջրաշխարհում շնաձուկ է ծնվել՝ չնայած այն բանին, որ տարածքում ոչ մի որձ շնաձուկ չի եղել, գրում է CNN-ը:

Կենդանին ծնվել է հունվարի սկզբին՝ լողավազանում, որտեղ ընդամենը 2 էգ շնաձուկ է եղել: Հաստատության մասնագետների խոսքով՝ այդ երկուսն ավելի քան երեք տարի չեն շփվել որձի հետ:

Սակայն, ըստ CNN-ի, այս պատմությունը կարող է ունենալ երկու բացատրություն. կարող է տեղի ունեցած լինել parthenogenesis (պարթենոգենեզ, կուսածնություն) երևույթը՝ անսեռ վերարտադրության ձև, որի դեպքում սաղմը զարգանում է առանց բեղմնավորման: Կամ էլ կարող է տեղի ունեցած լինել ուշացած բեղմնավորում. այսինքն բեղմնավորումը տեղի է ունենում զուգավորումից երկար ժամանակ անց:

Գիտնականնրից մեկը հայտնել է, որ պատահել է՝ էգ շնաձուկը սերմնահեղուկ է պահել առնվազն 45 ամիս։ Shreveport Aquarium-ը հայտնել է, որ գենետիկական թեստավորում կանցկացնեն, երբ ձագը բավականաչափ մեծանա՝ հստակ որոշելու, թե ինչպե՞ս է այն հայտնվել:

«Մենք շատ ոգևորված ենք և առաջիկա ամիսներին կպարզենք՝ արդյո՞ք սա իսկապես պարթենոգենեզի դեպք էր, թե՞ ուշացած բեղմնավորում: Դա իսկապես ապացուցում է, որ կյանքը գտնում է իր ճանապարհը»,-նշել են գիտնականները։