Հնդկաստանի Ուտտար-Պրադեշ նահանգում, Հնդկաստանի ամենախիտ բնակեցված քաղաքներից Կանպուրից ընդամենը երեք կիլոմետր հեռավորության վրա՝ Բեհտա գյուղում տեղակայված է Ջագաննաթհի եզակի տաճարը։ Ասում են, որ նա կարող է կանխատեսել անձրևը, և դա առասպել չէ: Պարզվում է, որ այս հնագույն կառույցի տանիքը սկսում է արտահոսել անձրևից մի քանի օր առաջ։ Անձրևների սեզոնի մեկնարկից մոտ մեկ շաբաթ առաջ, տաճարի տանիքից սկսում են կաթել ջրի կաթիլները: Այս մասին ֆեյսբուքի իր էջում գրել է «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը՝ նշելով, որ առաջիկա անձրևի ինտենսիվությունը կարելի է որոշել կաթիլների չափով։
«Հետաքրքիր է, որ հենց որ անձրև է գալիս՝ տանիքը դադարում է արտահոսել՝ ներսում մնալով ամբողջովին չոր։ Հետազոտողները բազմիցս փորձել են բացատրել այս երևույթը՝ տարբեր փորձեր կատարելով, սակայն մինչ այժմ բացատրություն չեն գտել այս զարմանալի երևույթի համար։ Գիտնականները կարծում են, որ այս երեւույթը կարող է կապված լինել նյութի յուրահատուկ հատկությունների հետ, որոնցից կառուցված է տաճարը, սակայն դա դեռ հնարավոր չէ ապացուցել։
Ջագաննաթհի տաճարը ոչ միայն ճարտարապետական հրաշք է, այլ նաև Հնդկաստանի մշակութային ժառանգություն: Այն դարձել է ամբողջ աշխարհից ժամանած ուխտավորների և գիտնականների գրավչության կենտրոն։ Տեղացիներն այս երեւույթն ընկալում են որպես աստվածային պատգամ, և հենց որ ջուրը սկսում է կաթել տաճարի տանիքից՝ գնում են գյուղատնտեսական աշխատանքների նախապատրաստվելու»,-նշել է նա։