Միջազգային աստղագետների խումբը կատարել է հայտնագործություն, որը կասկածի տակ է դնում մոլորակների ձևավորման վերաբերյալ ավանդական պատկերացումները։ Կարմիր թզուկ TOI-6894 աստղի շուրջ, որի զանգվածը կազմում է միայն Արեգակի զանգվածի 20%-ը, հայտնաբերվել է հսկայական գազային ուղեկից՝ TOI-6894b մոլորակը։ TOI-6894b-ը գազային հսկա է, չափերով համարժեք Սատուրնին, սակայն զանգվածով մոտ երկու անգամ ավելի թեթև։ Սա այն դարձնում է ամենամեծ մոլորակը, որ երբևէ հայտնաբերվել է նման փոքր զանգված ունեցող աստղի շուրջ պտտվելիս։ Նախկինում համարվում էր, որ նման մոլորակներ չեն կարող ձևավորվել նմանատիպ աստղերի շուրջ։ Այս հայտնագործությունն հնարավոր է դարձել TESS տիեզերական հեռադիտակի հավաքած տվյալների վերլուծության արդյունքում։ Աստղագետները ուսումնասիրել են ավելի քան 91 հազար կարմիր թզուկ՝ փնտրելով զանգվածային մոլորակներ։ TOI-6894b-ի գոյությունը հաստատվել է նաև Երկրից՝ օգտագործելով Շատ Մեծ Հեռադիտակը (Very Large Telescope)։ «Մենք չէինք ակնկալում նման մոլորակներ գտնել նման փոքր զանգված ունեցող աստղերի մոտ։ TOI-6894b-ը կարևոր թիրախ է մոլորակների գոյության ծայրահեղությունների ուսումնասիրության համար», – նշել են հայտնագործության հեղինակները։ Ենթադրվում էր, որ կարմիր թզուկները նման պայմաններ ապահովել չեն կարող։ Հնարավոր է՝ TOI-6894b-ը ձևավորվել է սկավառակի անկայունության հետևանքով կամ մի միջանկյալ սցենարով, որտեղ գազը կուտակվել է աստիճանաբար՝ առանց կտրուկ ագրեգացիայի։ Սակայն առայժմ որևէ տեսություն չի կարող ամբողջությամբ բացատրել այս մոլորակի ծագումը։ TOI-6894b-ի մասին լրացուցիչ տվյալներ կստացվեն «Ջեյմս Ուեբ» տիեզերական հեռադիտակի միջոցով իրականացվելիք մթնոլորտային վերլուծության ընթացքում։ Մոլորակը հետաքրքիր է իր անսովոր ցածր ջերմաստիճանով՝ մոտ 150°C, ինչը այն դարձնում է հիանալի օբյեկտ` սառը մթնոլորտների ուսումնասիրության համար։ Գիտնականները հույս ունեն հայտնաբերել դրա մթնոլորտում մեթան և հնարավոր է նաև մոլեկուլներ, որոնք չափազանց հազվադեպ են հայտնաբերվում Արեգակնային համակարգից դուրս։ TOI-6894b-ը նոր էջ է բացում արտամոլորակների ուսումնասիրության մեջ։ Այն վկայում է, որ նույնիսկ ամենացածր զանգված ունեցող աստղերը կարող են հսկայական ուղեկիցներ ունենալ, ինչը նշանակում է, որ նման աշխարհների քանակը մեր Գալակտիկայում կարող է էականորեն ավելի մեծ լինել, քան նախկինում էր համարվում։ Հետազոտության արդյունքները հրապարակվել են Nature Astronomy ամսագրում։