Սուրճ վաճառողներն ամբողջ աշխարհում կրճատել են գնումները՝ հումքի գների կտրուկ աճի պատճառով։ Այս մասին, հղում անելով իր աղբյուրներին, հայտնում է Reuters-ը։ Տեխաս նահանգի Հյուստոն քաղաքում կայացած Ազգային սուրճի արտադրողների ասոցիացիայի տարեկան համագումարի ժամանակ մասնակիցները հայտնել են, որ սուրճի առևտուրը գրեթե կանգ է առել՝ ICE բորսայում ֆյուչերսային գործարքների 70%-անոց աճի պատճառով։
Միևնույն ժամանակ, մանրածախ խանութները հրաժարվում են ընդունել սուրճի թանկացումը։
Էկվադորում գտնվող ELCAFE C.A. ընկերության գլխավոր տնօրեն Ռենան Չուեյրին հայտնել է, որ այս տարի լուծվող սուրճի արտադրողն առաջին անգամ չի կարողացել մինչև մարտ վաճառել սպասվող տարեկան ծավալը։
«Սովորաբար այս պահին մենք արդեն վաճառած կլինեինք ամբողջ արտադրանքը, բայց դեռևս վաճառել ենք ընդամենը 30%-ը։ Գների էական աճը նվազեցնում է հաճախորդների դրամական հոսքերը, նրանց գումարը չի բավարարում անհրաժեշտ քանակությամբ ապրանք ձեռք բերելու համար»,-նշել է նա։
Գների աճը պայմանավորված է հիմնական մատակարար երկրներում՝ հատկապես Բրազիլիայում, արտադրության կրճատմամբ։ Այդ պատճառով շուկայի շատ մասնակիցներ դադարեցրել են հումքի մեծածավալ գնումները և սահմանափակվել միայն փոքրաքանակ խմբաքանակներով, որոնք բավարար են ընթացիկ կարիքների համար։
Հետազոտությունների տվյալներով՝ արաբիկա սուրճի գները կարող են նվազել մոտ մեկ երրորդով մինչև տարվա վերջ, քանի որ բարձր գները զսպում են պահանջարկը, իսկ առաջին նախանշանները վկայում են ռեկորդային բերքի մասին։ Բացի այդ, Հնդկաստանը, Ուգանդան, Եթովպիան և Բրազիլիան որոշել են ընդլայնել սուրճի պլանտացիաների տարածքները՝ արձագանքելով գների աճին։
Սակայն մինչ իրավիճակը կայունանա, սուրճի արդյունաբերությունը կարող է լուրջ վնասներ կրել։ Օրինակ Պլեխանովի անվան Ռազմատնտեսագիտական համալսարանի ֆինանսների ամբիոնի դոցենտ Մարիա Դոլգովան նախազգուշացրել է, որ մինչև 2025 թվականի վերջը Ռուսաստանում սուրճը կարող է թանկանալ 20-25%-ով։ Գների աճի պատճառները կլինեն չորային եղանակը և առատ տեղումները Վիետնամում և Բրազիլիայում, որոնք ազդել են բերքատվության ծավալների վրա։