Հայ կոնյակագործներն այսօր բողոքի ակցիա էին կազմակերպել՝ հայտնելով, որ Վրաստանում բեռնատարներն օրերով կամ շաբաթներով պահում են, խմիչքը փորձաքննության ենթարկում։
Կոնյակագործների փոխանցմամբ՝ Ռուսաստան և Բալթյան երկրներ արտահանման համար նախատեսված կոնյակը Վերին Լարսի անցակետում ինքնաբուխ լաբորատոր փորձարկումների է ենթարկվում, ինչը հսկայական ուշացումների և ֆինանսական կորուստների է հանգեցնում։
-Այն, ինչ հիմա տեղի է ունենում՝ հակասում է առևտրի համաշխարհային կազմակերպության կանոններին։ Որպես տրանզիտային բեռներ՝ դրանք պետք է հանգիստ տեղաշարժվեին Վրաստանի տարածքով։ Վրաստանը խախտել է բեռնափոխադրումների ազատ տեղաշարժման իրավունքը։ Ասեմ, որ Վրաստանի տնտեսությունը գտնվում է Թուրքիա-Ադրբեջան զույգի ազդեցության ներքո, արտահանումը չի անցնում 35 տոկոսը և դա շատ վատ ցուցանիշ է։ Դրան գումարած՝ առաջին գործընկերները Թուրքիան և Ադրբեջանն են, ապա Ռուսաստանը։ Հետևաբար Վրաստանը հիմա փորձում է հաճոյանալ Թուրքիային և Ադրբեջանին ,-լրագրողների հետ զրույցում ասաց Հայաստանի գործատուների հանրապետական միության նախագահ Գագիկ Մակարյանը՝ հավելելով, որ Վրաստանն արտահանում է 250 միլիոն դոլարի գինի և կոնյակ։ Կոնյակը կազմում է 1,5 միլիոն շիշ, Հայաստանինը՝ 25 միլիոն շիշ։
-Վրաստանը վերցնում է մեր արտահանողների փաստաթղթերը, ուսումնասիրում և տեսնում է կոմերցիոն գաղտնիքները և համոզված եմ՝ ինֆորմացիան փոխանցելու են իրենց կոնյակագործներին և փորձելու են շուկան խաթարելով գրավել։ Ուղղակի տնտեսական տեռոր է ՀՀ կոյակագործության հանդեպ,-եզրափակեց Գագիկ Մակարյանը։