Ազգային ժողովը քննարկում է տրանսպորտի ուղեվարձը չվճարելու համար նախատեսված տուգանքների նախագիծը։
Տարածքային կառավարման և ենթակառուցվածքների փոխնախարար Արմեն Սիմոնյանը ներկայացրեց նախագիծը։ Նրա փոխանցմամբ՝ վարչական իրավախախտումների վերաբերյալ օրենսգրքով առաջարկվում է կատարել լրացում, որով տրանսպորտային վճարի չվճարման կամ այդ կրիչը չվավերացնելու համար առաջանում է տուգանք՝ 15 հազար դրամի չափով:
«Եթե քաղաքացին օգտվել է ոչ իր կողմից ձեռք բերված կամ արտոնություն ունեցող անձի կրիչը կրող քարտից կամ արտոնությունից ընդհանրապես, ապա այս պարագայում սահմանվում է 15-ապատիկի չափով, այսինքն՝ 15 հազար դրամ, և 3-ապատիկի չափով է սահմանվում, եթե ունի նման հնարավորություն, արտոնություն, սակայն չի վավերացրել կրիչը տրանսպորտային միջոցում, այսինքն՝ տրանսպորտային միջոց բարձրանալիս ձեռք է բերել համապատասխան իրավունք, սակայն այդ իրավունքը չի վավերացրել»,- ասաց նա:
Փոխնախարարը նաև տեղեկացրեց, որ եթե տեխնիկական խնդիր է առաջացել, և տրանսպորտային ծառայություն մատուցողը չի կարողացել վավերացնել քաղաքացու ձեռք բերած կրիչը, ապա այդ դեպքում վարչական պատասխանատվություն չի կիրառվելու: