Սառը եղանակը ցիտրուսային մրգերի սեզոնն է։ Անպայման պետք է դրանք կանոնավոր կերպով ներառել սննդակարգում, և սիրտն ու անոթները շնորհակալ կլինեն ձեզ։ «Եթե ամեն օր ուտեք գոնե մեկ նարինջ, կարող եք մեծ օգուտ բերել ձեր առողջությանը, այդ թվում՝ նվազեցնել սիրտ-անոթային հիվանդությունների զարգացման վտանգը»,-aif.ru-ի հետ զրույցում ասել է բժիշկ-դիետոլոգ, բժշկական գիտությունների թեկնածու, Սննդի և կենսատեխնոլոգիաների գիտահետազոտական կենտրոնի ավագ գիտաշխատող Նատալյա Դենիսովան։ Բժշկի խոսքով՝ կանխարգելիչ ազդեցություն առաջին հերթին ունեն կենսաբանական ակտիվ նյութերը՝ ֆլավոնոիդները (նարինջի հիմնական ֆլավոնոիդը հեսպերիդինն է):
Դրանք հակաօքսիդանտներ են, որոնք ապացուցված դրական ազդեցություն ունեն սիրտ-անոթային համակարգի վրա։ «Ֆլավոնոիդները բարենպաստ ազդեցություն են ունենում անոթների պատերի վիճակի վրա, արյունն ավելի լավ է հոսում անոթներով, նվազում է թրոմբների առաջացման հավանականությունը,- բացատրել է բժիշկը։ Բացի այդ, գիտական հետազոտությունները ցույց են տալիս, որ նարնջի հակաօքսիդանտները նպաստում են արյան մեջ խոլեստերինի մակարդակի նվազմանը։ Դրանք նաև նվազեցնում են անոթների պատերի բորբոքային գործընթացները։
Այս ամենն օգնում է կանխել այնպիսի սիրտ-անոթային հիվանդություններ, ինչպիսիք են աթերոսկլերոզը, հիպերտոնիան, ինսուլտները, ինֆարկտները»։ Վիտամիններով ու օգտակար նյութերով հարուստ նարինջը մեծ քանակությամբ վիտամին C է պարունակում, ինչպես նաև կարոտինոիդներ՝ ակտիվ հակաօքսիդանտներ, B խմբի վիտամիններ։ Որքան ավելի վառ է նարնջի գույնը, այնքան ավելի շատ կարոտինոիդներ կան նրանում։ Այն նաև հանքային նյութերի աղբյուր է՝ պարունակում է կալիում, կալցիում, մանգան, մագնեզիում, երկաթ և այլ տարրեր։ «Մեկ նարինջը գրեթե ամբողջությամբ ապահովում է օրվա համար անհրաժեշտ վիտամին C-ի չափաբաժինը»,- ընդգծել է բժիշկը։