Նոթինգհեմի համալսարանի (Անգլիա) գիտնականների կողմից արված հետազոտությամբ կապ է հայտնաբերվել վատ քնի որակի և դավադրության տեսությունների նկատմամբ նախատրամադրվածության միջև, որտեղ կարևոր դեր է խաղում դեպրեսիան։
Մասնագետներն անցկացրել են երկու հետազոտություն ավելի քան հազար մարդու մասնակցությամբ՝ պարզելու, թե արդյո՞ք քնի պակասն ազդում է դավադրության տեսություններին հավատալու հակվածության վրա։ Արդյունքները ցույց են տվել, որ մարդիկ, ովքեր մեկ ամսվա ընթացքում քնի խնդիրներ են ունեցել, ավելի հաճախ են համաձայնել դավադրական մեկնաբանությունների հետ, հատկապես այն բանից հետո, երբ ծանոթացել են համապատասխան նյութերին։
Առաջին հետազոտության շրջանակում 540 մասնակից անցել է քնի որակի գնահատում, ապա կարդացել հոդված Փարիզի Աստվածամոր տաճարի հրդեհի մասին։ Մի մասին ներկայացվել է տարբերակ, ըստ որի՝ իրական պատճառները դիտավորյալ թաքցվել են, իսկ մյուսներին՝ պաշտոնական տարբերակը, ըստ որի՝ հրդեհը պատահական է եղել։ Քնի խանգարում ունեցող մարդիկ ավելի հակված են եղել հավատալու դավադրության տեսություններին։
Երկրորդ հետազոտությունը, որին մասնակցել է 575 մարդ, օգնել է բացահայտել հոգեբանական մեխանիզմները, որոնք կապում են վատ քնի որակը և դավադրական մտածողությունը։ Վերլուծությունը հաստատել է, որ անքնությունը և քնի պակասը կապ ունեն դավադրության տեսություններին վստահելու հետ, ընդ որում՝ վճռորոշ գործոնն այստեղ դեպրեսիան է։ Զայրույթը և պարանոյան նույնպես ազդել են, բայց դրանց ազդեցությունը եղել է ավելի թույլ։
«Քունն առանցքային դեր է խաղում հոգեկան առողջության և ճանաչողական կարողությունների պահպանման գործում։ Ապացուցված է, որ դրա պակասը մեծացնում է դեպրեսիայի, տագնապի և պարանոյայի ռիսկը՝ վիճակներ, որոնք նպաստում են դավադրության տեսություններին հավատալուն։ Սակայն քնի որակի բարելավումը կարող է նվազեցնել այդ նախատրամադրվածությունը»,- նշել է հետազոտական խմբի ղեկավար, դոկտոր Դենիել Ջոլլին։