Ամբողջ Եվրոպայում ավելի քան 10.000 հյուրանոց դատի է տվել Booking-ին՝ գների պարտադիր ֆիքսման համար։ Booking-ը հանրահայտ առցանց հարթակ է, որի միջոցով միլիոնավոր մարդիկ ամրագրում են կացարաններ։ Սակայն երկար տարիներ այն հյուրանոցներին ստիպել է որևէ տեղ չառաջարկել իրենց սենյակներն ավելի ցածր գնով, քան՝ հենց Booking-ում՝ նույնիսկ սեփական կայքերում։ Եթե որևէ հյուրանոց խախտում էր այդ կանոնը, Booking-ը կարող էր հեռացնել այն հարթակից, ինչի արդյունքում հյուրանոցը կորցնում էր հաճախորդներին։ Միաժամանակ՝ Booking-ն ամեն ամրագրումից պահում էր մինչև 17% միջնորդավճար և վճարային գանձումներ։
Այժմ Եվրոպայի ավելի քան 10․000 հյուրանոց համատեղ հայց են ներկայացնում Booking-ի դեմ։ Թեև ֆիքսված գնի այս կանոնը անցած տարրի չեղարկվել է Եվրոպական դատարանի որոշումից հետո, հյուրանոցները հիմա փորձում են փոխհատուցում ստանալ վերջին 20 տարվա վնասների համար՝ 2004թ․-ից մինչև 2024 թվականը։
«Եվրոպացի հյուրանոցատերերը տարիներ շարունակ տուժել են անարդար պայմաններից և չափազանց բարձր ծախսերից։ Այժմ ավելի քան 10․000 բիզնես մասնակցում է այս հավաքական հայցին՝ ուղարկելով Booking-ին հստակ ազդանշան․ թվային շուկայում չարաշահումներն անպատասխան չեն մնա»,-հայտարարել է Եվրոպական հյուրանոցների միություն Hotrec-ի նախագահ Ալեքսանդրոս Վասիլիկոսը։
Գործը քննվում է Նիդերլանդներում, քանի որ Booking-ի գլխամասային գրասենյակը գտնվում է Ամստերդամում։ Գործը համակարգում է Hotel Claims Alliance կազմակերպությունը։ Կազմակերպիչների խոսքով՝ հավաքական հայցը հսկայական արձագանք է գտել, և այդ պատճառով հայտերի ներկայացման վերջնաժամկետը երկարաձգվել է մինչև օգոստոսի 29-ը։