ԱՄՆ-ում Կենտուկի նահանգի 100-ամյա բնակչուհին որոշել է կրկին աշխատել, քանի որ ձանձրացել է թոշակի անցնելուց հետո՝ մնալով առանց շփման։ Նրա պատմությունը ներկայացրել է The New York Times-ը։ Լուիսվիլից Ջոկլետա Ուիլսոնը հոբելյանը նշել է 2024 թվականի հոկտեմբերին։ Նա երկար տարիներ եղել է պրոֆեսիոնալ պարուհի, ապա 37 տարի դասավանդել է քաղաքի պարի ակադեմիայում։ Չնայած իր պատկառելի տարիքին՝ նա շարունակում է ապրել սեփական տանը, վարում է մեքենա և շաբաթական երկու օր աշխատում Home Depot ցանցի գործիքների և շինանյութերի խանութում։
«Ես երեք անգամ թոշակի եմ անցել։ Ամեն անգամ այն տևել է 10 տարի, իսկ հետո այնքան էի հոգնում ինքս ինձնից, որ այլևս չէի կարողանում դիմանալ», – բացատրել է 100-ամյա կինը։ Նա նշել է, որ չի կարող ապրել առանց մարդկանց հետ շփվելու, և հենց այդ պատճառով էլ որոշել է վերադառնալ աշխատանքի։ Ուիլսոնը հաղթահարել է կրծքագեղձի քաղցկեղը, ունի սիրտ-անոթային խնդիր։
«Պետք չէ մտածել անհեթեթությունների մասին։ Մի՛ անհանգստացեք, մի՛ բարկացեք։ Զայրութը մեծ էներգիա և ամեն լավ բան խլում է ձեր կյանքից։ Շատ ավելի հեշտ է լավ բաների մասին մտածել, քան վատ բաների մասին։ Սա շատ ավելի քիչ ջանք է պահանջում: Եվ դա այն է, ինչ ես փորձում եմ անել», - խորհուրդ է տվել նա: