Հնդկաստանում մահացել է Ֆաուջա Սինգհը, ով հայտնի էր որպես աշխարհի ամենատարեց մարաթոնավազորդ։ Նա 114 տարեկան էր։ Ինչպես հայտնել է նրա կենսագիրը՝ Խուշվանտ Սինգհը, ողբերգությունը տեղի է ունեցել նախօրեին՝ Հնդկաստանի Պենջաբ նահանգի Բիաս գյուղում։ «Նրան հարվածել է անհայտ մեքենա, երբ անցնում էր ճանապարհը։ Հանգչիր խաղաղությամբ, իմ սիրելի Ֆաուջա», — գրել է Խուշվանտ Սինգհը։ Լոնդոնում գործող Sikhs In The City վազորդների ակումբը, որտեղ Սինգհը երկար ժամանակ մարզվել է, նույնպես հաստատել է տխուր լուրը։ Ֆաուջա Սինգհը սկսել է վազքով զբաղվել միայն 89 տարեկանում՝ կնոջ մահվանից հետո։ Ամենահայտնի մարաթոնը տեղի ունեցավ 2011 թվականին` Տորոնտոյում։ Այնտեղ նա անցավ 42 կիլոմետր՝ 8,5 ժամում և դարձավ առաջին մարդը, ով հաղթահարեց մարաթոնյան հեռավորությունը 100 տարեկան հասակում։ Ռեկորդը չի գրանցվել Գինեսի ռեկորդների գրքում, քանի որ Սինգհը չի ունեցել պաշտոնական ծննդյան վկայական։