ԱՄՆ-ում փոքրիկ երեխա, որին ավելի քան 150 անգամ խայթել էին իշամեղուները, հայտնվել է վերակենդանացման բաժանմունքում։
ԱՄՆ-ի Ջորջիա նահանգում երկու տարեկան Բեքհեմ Ռիդը հայտնվել է կյանքի և մահվան եզրին, երբ նրա վրա հարձակվել են իշամեղուները։ Տղան պատահաբար իր խաղալիք մեքենայով բախվել է իշամեղուների բնին։ Միջատները անմիջապես հարձակվել են, ինչի արդյունքում երեխան ստացել է ավելի քան 150 խայթոց։
Ըստ New York Post-ի՝ Բեքհեմի հայրը փորձել է օգնել որդուն, բայց ինքը ևս ենթարկվել է իշամեղուների հարձակմանը։ Ծնողները շտապ տարել են տղային հիվանդանոց։ Այնտեղ նրան ցավազրկողներ և հակահիստամինային դեղեր են տվել ու տուն ուղարկել։ Հաջորդ օրը երեխայի մաշկը սկսել է դեղնել, ուստի ընտանիքը դիմել է մեկ այլ կլինիկա։ Ախտորոշվել է սրտի, լյարդի և երիկամների անբավարարություն։
«Տարիքի, քաշի և խայթոցների քանակի պատճառով նրա փոքրիկ մարմինը պարզապես չէր կարողանում հաղթահարել տոքսինները», - GoFundMe էջում գրել է նրա մորաքույր Թիֆանի Հյուեթը։
Բեքհեմն այժմ գտնվում է վերակենդանացման բաժանմունքում՝ միացված արհեստական շնչառության սարքերին, դիալիզին և ներերակային ներարկումներին։ Հակաթույն չկա, և ինչպես Թիֆանին բացատրում է, բժիշկները կարող են օգնել` մինչև ինքնուրույն թույնը դուրս գա։