Ո՞րն է 17 կուսակցությունների հովանավորների ու հարթակում երևացողների նպատակը

«Մենք երբեք չենք հաշտվի այն եռակողմ համաձայնագրի հետ, որ ձևակերպված է որպես հայտարարություն, բայց դա աշխատում է դե ֆակտո և չենք կարող փոխել և հրաժարվել դրանից»,- ասաց վարչապետի միասնական թեկնածու Վազգեն Մանուկյանը՝ Ազատության հրապարակում դեկտեմբերի 5-ին հրավիրված հանրահավաքին ներկայացնելով նոր կառավարության առաջնահերթ գործողությունները և հակաճգնաժամային քայլերը։

Ըստ Վազգեն Մանուկյանի՝ դա կնշանակի պատերազմ Ադրբեջանի և Թուրքիայի հետ, կնշանակի նաև խռովություն ՌԴ խաղաղապահ զորքերի հետ։

«Եթե շարժումը չհաղթի, գազազած ժողովուրդն իրեն կհոշոտի։ Այս շարժումն այն ճանապարհն է, որ իրեն հնարավորություն է տալիս քաղաքակիրթ ձևով փոխել իրավիճակը Հայաստանում։ Ձախողվեց, ավելի վատ է լինելու, բայց ինքը բոլոր դեպքերում գնալու է»,- հայտարարեց Մանուկյանը՝ խոսքում նկատի ունենալով ՀՀ վարչապետ Նիկոլ Փաշինյանին։

Իսկ ի՞նչ էր նշանակում այս հայտարարությունը՝ կրկին ահ ու սարսա՞փ տարածել 2 տարի առաջ այն թոթափած ազգի մոտ։ Ժողովրդին հիմարի տե՞ղ են դնում, նրանց կարծիքով մարդիկ ոչինչ չե՞ն հասկանում։ Ո՞րն է գերիների, անհետ կորածների հարցը լուծելու, սգացող ընտանիքների վիշտը գոնե հարգելու փոխարեն երկրում խառնաշփոթ ստեղծելու ու այսպես ասած՝ հեղաշրջում անելու փորձի նպատակը։ Պատասխանը մեկն է՝ այստեղ պետության հարցը չէ, ժողովրդի հարցը չէ, կրկին իշխանության գալն ու կրկին ստորացած ժողովուրդ ունենալն է։

Այս 17 կուսակցությունները, որոնց ստեղծողներն ու հովանավորներն են՝ Ռոբերտ Քոչարյանը, Սերժ Սարգսյանը, ՀՅԴ-ն, ԲՀԿ-ն ու ներկայիս նախագահ Արմեն Սարգյանը, մեկ բան են ուզում՝ իշխանություն ու վրեժ։

Զավեշտն այն աստիճանի է հասել, որ անգամ որոշել են, թե ում և ինչ պաշտոն են բաժանելու․օրինակ՝ Քոչարյանը վարչապետ, ներկայիս վարչապետացու Վազգեն Մանուկյանն էլ Պաշտպանության նախարար։ Օհ, ինչպիսի թիմ։

Թիմ, որ դեռ պատերազմի ընթացքում ռազմական հեղաշրջում անելու երազանքով էր տարված, դա չստացվեց՝ ռազմաճակատում ասեկոսեներ սկսեցին տարածել, որ խառնաշփոթ լինի։ Թիմ, որ արտերկրի հայերի մոտ այնպիսի տպավորություն է ուզում ստեղծել, թե հիմա Հայաստանում երկրի վիճակն այնքան վատ է, որ մարդիկ ուզում են արտագաղթել։ Ինչպես կասեր ձեր ախպերը՝ իյա, իրո՞ք։ Արտագաղթ կլինի այն ժամանակ, երբ նախկին թալանչիներից, մարդասպաններից որևէ մեկը գա իշխանության։

Ձեր խոսքերից է, չէ՞․․գանք սաղ կմտնեն մկան ծակը,-բա իհարկե, ցավոք, 2,5 տարում չկարողացավ այս իշխանությունը ձեր արժանի տեղը ցույց տալ՝ մեծ տեղ տալով թավիշին ու վստահելով դատական համակարգին։ Ի՞նչ դատական համակարգ, երբ քննիչները դիտավորյալ այնպիսի գործեր են հարուցում, որ դատարանում հնարավոր լինի խուսափել կալանքից։ Ձեր ծնած, սնած քննիչները մինչ օրս սարսափում եմ ձեզանից, տեսնես ո՞ւմ և ինչո՞վ եք վախեցնում։Չնայած, կռահելը կարծես թե դժվար չէ։

Խոսում են բանակից․․այ հայրենիքի ու բանակի մասին մտածողներ, դեռևս արցախյան առաջին պատերազմի ժամանակ արդեն ակնհայտ է եղել, որ թշնամին ունի առավելություն՝ կապված զինատեսակների հետ։ Բա դուք 27 տարի ինչո՞վ էիք զբաղված՝ 7 շրջան հանձնելու բանակցություններից , երկրում եղած-չեղածը օտարներին վաճառելուց բացի։ Լույսը, ջուրը, գազը, երկաթգիծը ո՞ւմ վաճառեցիք ու ազգին ստրուկ դարձրիք։

Հատուկ ձեզ համար՝ 13.08.2020թ․ հրապարակված զեկույցից հատված․Հայաստանի տնտեսությունը ծայրահեղ կախման մեջ է Ռուսաստանից: Այսպիսի եզրահանգման է եկել «Թրանսփարենսի ինթերնեշնլ հակակոռուպցիոն կենտրոնի»՝ «Մասնավորեցումը եւ օտարերկրյա ներդրումները Հայաստանի Հանրապետությունում 1997-2020 թվականներին» հետազոտության հեղինակը: Այս ուսումնասիրությունը վերաբերում է վերջին 20 տարիներին կատարված խոշոր  եւ խնդրահարույց մասնավորեցման գործարքներին: Զեկույցի հեղինակը պարզել է՝ Ռուսաստանը 1997 թվականից ի վեր ՀՀ տնտեսության կարեւորագույն ճյուղերում՝ Էներգետիկա, բանկային համակարգ, հեռահաղորդակցություն, տրանսպորտային կապուղիներ, հանքարդյունաբերություն եւ այլ ոլորտներում ծանրակշիռ ու գլխավոր դերակատարում է ստանձնել՝ ինչպես պետական, այնպես էլ մասնավոր ընկերությունների մասնակցությամբ, հաճախ բավականին խնդրահարույց գործընթացների արդյունքում։ «Էներգետիկայի ոլորտում՝ Ռուսաստանից վառելիքի մատակարարումների մեծ ծավալն ու որեւէ այլընտրանքի բացակայությունը, հեռահաղորդակցության ոլորտում՝ բջջային կապի ծառայություններ մատուցող օպերատորների սակավությունը եւ ռուսական սեփականություն հանդիսացող ընկերությունների գերիշխանությունը, ֆինանսական ոլորտում՝ ռուսական կապիտալի զգալի ծավալը եւ Ռուսաստանի ֆինանսական շուկայում ցնցումների հավանականությունը մեծապես խոցելի են դարձրել Հայաստանի Հանրապետության ինքնիշխանությունը եւ երկրի կայունությունը: Հայաստանում գույքի անարդյունավետ եւ ոչ թափանցիկ կառավարումը, հաշվետվողականության բացերը, օրենսդրական թերությունները, կուտակված պարտքերը, ինչպես նաեւ լայնածավալ կոռուպցիան օգտագործելով՝ ռուսական պետական ընկերությունները տարբեր ժամանակներում տարբեր մարտավարություններ են կիրառել Հայաստանի բազմաթիվ, բայց գլխավորապես էներգետիկ ռեսուրսներին տիրանալու համար»,-նշվում է զեկույցում։

«Պետք է նկատել, որ ՌԴ-ն իր ընկերությունների հետ կնքված համաձայնագրերն օգտագործել է որպես գործիք, որպեսզի խոչընդոտի մրցակցությունը եւ Հայաստանի իշխանություններին պարտադրի հրաժարվել արեւմտյան գործընկերների հետ համագործակցությունից։ Այսպես՝ ՀԷՑ-ի սեփականաշնորհման ժամանակ Ռուսաստանի դեսպանը հայտարարել էր, որ մրցույթին ռուսական ընկերությունների մասնակցության արգելքը հակասում է տնտեսական համագործակցության խորացման ռուս-հայկական համաձայնագրի դրույթներին, մինչդեռ «Իտերա»-ն դուրս էր մնացել մրցույթից, քանի որ չէր ներկայացրել իր ֆինանսական բարվոք վիճակը հավաստող միջազգային աուդիտորական ընկերության եզրակացություն: Ռուսական պետական էներգետիկ ընկերություններն արել են ամեն հնարավորը, որպեսզի Հայաստանին թույլ չտան դիվերսիֆիկացնել իր էներգետիկ կարողությունները, միջպետական համաձայնագրերով խոչընդոտներ են ստեղծել գազի մատակարարման այլընտրանքային աղբյուրների եւ խողովակների համար: Ռուսաստանը, օգտվելով իր կողմից մատակարարվող գազից Հայաստանի կախվածությունից, ՀԷՑ-ի սեփականաշնորհման ամենավճռորոշ պահին ռուսական Գազպրոմի միջոցով գործի է դրել գազի մատակարարման դադարեցման սպառնալիքը, որպես ճնշման միջոց»,-նշվում է զեկույցում:

Զեկույցում նշվում է, որ էներգետիկ կախվածության եւ ռուսական ընկերությունների՝ ՀՀ տնտեսության բոլոր հիմնական ճյուղերում լայն ներկայացվածության պատճառով Հայաստանը խիստ խոցելի է ռուսական տնտեսության եւ ֆինանսական շուկաների ցնցումների նկատմամբ:

Իշխանություն գալու համար ամեն ինչի պատրաստ հայրենասեր կոչեցյալներ, ի՞նչ կառաջարկեք թվարկածի հետ կապված, միայն ազատ ու անկախ երկրում ապրելու, վերջապես զարգացող պետություն ունենալու ազգի մաքուր ցանկության վերջը տալու, վրեժ լուծելով հո չէ։

Ամոթն ի՞նչ է, որ մի գրամ չկա ձեր մոտ։ Այո՛, մատնանշեք ներկայիս իշխանության սխալները, հորդորեք, որպեսզի քննություն կատարվի ու ի վերջո պարզեն, թե ովքե՞ր էին պատերազմի ժամանակ ստեր տարածում, ովքե՞ր էին ռազմական հեղաշրջում ցանկանում անել, այդ ո՞ր հրամանատարները թողեցին ու փախան և այլն։ Միասին պարզեք, չէ՞ որ ինչ անում եք՝ պետության համար եք անում։ Իսկ հետո հանգիստ պատրաստվեք նոր ընտրությունների, որը կլինի արդար, ոչ թե կգաք իշխանության ու կսկսեք 5000 դրամով մարդկանց գնել։ Մոռացե՛ք ձեր այդ երազանքի մասին ու հանգիստ նստե՛ք տեղներդ։ Մեռելները հարություն չեն առնում։

Վերջում , հատուկ ձեզ համար նաև քաղաքացիների կարծիքներ, որոնք ներկայացնում ենք առանց անունների։

***Շատ անուղեղներ ասում են՝ նիկոլապաշտներ եք , բայց չեն հասկանում, որ հարցն անձը չէ, նա մի օր եկել է մի օր գնալու է։ Հարցը նրա տված ազատությունն է , երբ չի գործում կլանի 50/50ը, երբ պորճերի հղփացած թուլեքը չեն կարողանում հասարակ քաղաքացուն նեղացնել, երբ դու քո երկրում սկսեցիր քեզ մարդ զգալ, երբ դու քո ձայնի տերն ես։Իրոք՝ վայ մեզ, եթե մերժված հներին թույլ տանք վերադարձ։Հինն էլ ենք տեսել նորն էլ։

***Քրոջս տղան հրաժարվեց ԱՄՆ-ից Հայաստան տեղափոխվել։Արդեն տուն էր առնում Երևանում, բայց դեկտեմբերի 5-ի միտինգից հետո, երբ հայտարարվեց, որ կոշտ քայլեր կձեռնարկվի ու երկիրը կաթվածահար կարվի, նա որոշումը փոխեց։Իմ ծանոթ արտասահմանցի մի ընտանիքի, երեկ երեկոյան հանդիպեցի, ասացին իրենց բիզնեսը որոշել են այլ երկիր տեղափոխել, քանի որ այլևս Հայաստանում իրենց ապահով չեն զգում։Ունեմ ուրիշ հայ ընկերներ, որոնք որոշել էին Հայաստան տեղափոխվել, բայց փոշմանել են։

Հեղափոխությունից հետո Հայաստան տեղափոխվեցին հարազատներս իրենց ընտանիքով` Իրանից, Ֆրանսիայից,Անգլիայից։Անցած 2,5 տարվա ընթացքում հինգ ընկերներս իրենց ընտանիքներով նույնպեդ տեղափոխվեցին Հայաստան։Հիմա հակառակ պրոցեսն է սկսել։Նրանք բոլորը սարսափում են նախկինների վերադարձից։Սա փաստ է։

Հեղինակ՝ Արման Սարիբեկյան